Лойиҳа Сўзоқ туманидаги 5та умумий ўрта таълим мактабида амалга  оширилмоқда

Вилоят ҳокими ўринбосари Ертай Алтаев лойиҳа муаллифи, “ECO Network” дастури раҳбари Евгений Мухамеджанов билан учрашиб, аҳолида экология маданиятини шакллантириш масалаларини муҳокама қилди.

«Яшил мактаб» лойиҳаси “КАТКО” компанияси томонидан молиялаштирилиб, вилоят ҳокимлиги шафелигида амалга оширилмоқда. Шунингдек, у «Тоза Қозоғистон» давлат дастури доирасида мамлакат бўйлаб экологик онгни юксалтиришга ҳисса қўшмоқда.

– Бугунги кунда Президент Қасим-Жўмарт Тўқаев ташаббуси билан амалга оширилаётган “Тоза Қозоғистон” лойиҳаси бу – маънавий уйғониш ҳаракатидир. У тозаликни фақат атроф-муҳит эмас, балки инсон онги, қалби ва виждонидан бошлаш зарурлигини таъкидлайди, – деди лойиҳа тақдимотида сўзга чиққан  Е. Алтаев. 

Лойиҳа орқали мамлакатда экологик маданиятни юксалтириш, аҳолини табиат ва муҳитга масъулият билан ёндашишга ўргатиш мақсад қилинган. Ушбу ташаббус кўчалар, дарё ва тоғларни тозалашга, қалб ва фикрларни янгилашга, янги авлод онгини уйғотишга хизмат қилади.