Қизилўрда шаҳрида ўтган Бешинчи Миллий қурултой мамлакат тараққиётининг навбатдаги босқичига ўтишда мазмунан янги ёндашувларни белгилаб берди. Қурултойда билдирилган таклиф ва ташаббуслар жамиятда узоқ вақтдан буён муҳокама қилиб келинаётган масалаларга аниқ ечимлар таклиф этилгани билан аҳамиятлидир.

Айниқса, қонун чиқарувчи органни такомиллаштиришга қаратилган таклифлар диққатга сазовор. Парламент тузилмасини янгилаш, бир палатали тизимга ўтиш, депутатлар сонини мақбул даражада белгилаш, овоз бериш тартибларини соддалаштириш ҳамда партиявий рақобатни кучайтириш орқали вакиллик институтининг самарадорлигини ошириш мақсади кўзда тутилмоқда. 

Қурултой доирасида Қозоғистон халқи Ассамблеяси фаолиятини янги мазмун билан бойитишга ҳам алоҳида эътибор қаратилди. Ассамблея ва Миллий қурултой ўртасидаги ўзаро ҳамкорликни кучайтириш асосида Халқ кенгашини ташкил этиш ташаббуси илгари сурилди. Ушбу тузилма этник гуруҳлар, жамоат ташкилотлари ва маҳаллий вакиллик органлари ўртасида мулоқотни мустаҳкамлашга хизмат қилиши кутилмоқда.

Муҳим жиҳати шундаки, Ассамблея ва Миллий қурултойнинг мақомини янада мустаҳкамлаш, уларнинг ўрни ва аҳамиятини Конституция даражасида белгилаш, шунингдек, муайян даражада қонунчилик ташаббуси ҳуқуқини бериш масалаларининг илгари сурилиши ушбу соҳаларнинг жамият ҳаётидаги таъсири ошиб бораётганини кўрсатади.

Умуман олганда, Бешинчи Миллий қурултойда қабул қилинган ёндашувлар мамлакатда олиб борилаётган ислоҳотларнинг изчил ва пухта эканлигини тасдиқлайди. Бу қарорлар давлат бошқарувини замонавий талабларга мослаштиришга, фуқароларнинг сиёсий жараёнлардаги иштирокини кенгайтиришга ҳамда жамиятдаги барқарорлик ва бирдамликни мустаҳкамлашга хизмат қилиши билан аҳамиятлидир.