15 март куни ҚР халқи янги Конституцияни қабул қилиш мақсадида референдумда иштирок этади.

Бир палатали Парламент, Халқ кенгаши, Ҳукумат фаолияти, суд тизими ва ҳуқуқни муҳофаза қилиш соҳасининг янгиланган шаклларини, конституциявий дастакларини ўзида жо этган ушбу ҳужжат келажакда инсон фаровонлиги ва жамиятнинг барқарор равнақи учун хизмат қилади, деган умиддамиз. Янги таҳрирдаги Конституция билан аҳоли ОАВ ва ижтимоий тармоқлар орқали танишишди, кенг жамоатчилик вакиллари, сиёсий партиялар аъзолари юритган тарғибот тадбирларида бевосита иштирок ҳам этишди. Қолаверса, вилоятдаги этномаданият бирлашмалари Қозоғистон Республикасининг янги Конституцияси лойиҳасини қўллаб-қувватлашини маълум қилиб, ушбу ташаббус, аввало, миллатлараро тотувликни тараққий эттириш ҳамда этномаданий хилма-хилликни сақлашга йўналтирилганини алоҳида таъкидлашди. Бирлашмалар вакилларининг фикрича, Асосий Қонунга киритилган ўзгаришлар фуқароларнинг ҳуқуқий тенглигини аниқ белгилаб, қарор қабул қилиш жараёнларида иштирокини кенгроқ таъминлайди ва давлат ҳамда жамият ўртасидаги ўзаро масъулият қоидаларини кучайтиради. 

Мухтасар қилиб айтганда, Конституция лойиҳаси халқ эътиборига ҳавола этилди. 15 мартда референдум ўтади. Бу ягона эл сифатида мамлакатнинг порлоқ келажагини ҳамкорликда барпо этишга чақириқдир. 

Шу боис, референдумда фаол иштирок этайлик.