Конституция – ҳар қандай давлатнинг сиёсий-ҳуқуқий пойдевори, мамлакат тараққиётининг аниқ йўналишини белгилаб берувчи асосий ҳужжатдир. У фуқароларнинг ҳуқуқ ва эркинликларини таъминлаш билан бирга, жамиятда адолат, тенглик ва масъулият тамойилларини мустаҳкамлайди. 

Ислоҳотлар ҳар бир фуқарога мамлакат тақдирига бефарқ бўлмасдан, жамият ҳаётида фаол иштирок этиш имконини яратади. Бу ташаббуслар умуминсоний қадриятларни мустаҳкамлаш, жамиятда бирлик ва ўзаро ишончни кучайтиришга қаратилган.

Бугунги кунда турли давраларда янги Бош Қомусимизнинг лойиҳаси кенг жамоатчилик иштирокида муҳокама қилинмоқда. Бу – демократик жамиятнинг муҳим белгисидир. Айниқса, давлат бошқаруви тизимини такомиллаштиришга қаратилган таклифлар қўллаб-қувватланмоқда. Жумладан, Олий қонун чиқарувчи тузилма сифатида анъанавий Парламент ўрнига Қурултой тизимини жорий этиш таклифи тарихий тажриба ва халқ иродасига таянадиган муҳим ташаббус сифатида намоён бўлмоқда.

Бу борада жамият билан ҳокимият ўртасида самарали мулоқотни таъминловчи Халқ кенгашининг ўрни алоҳида. У – очиқ фикр алмашиш, муҳим масалаларни биргаликда муҳокама қилиш имконини берувчи ишончли майдондир. Қурултой каби кенг вакилликка асосланган тузилма эса халқ манфаатларини тўлиқ ифода этиш, давлат қарорларини жамоатчилик билан ҳамжиҳатликда қабул қилишга хизмат қилади. Бу ерда ҳар бир фуқаро ўз фикрини эркин билдириб, мамлакат тараққиётига муносиб ҳисса қўшиши мумкин.

Маълумки, бирлик ва ҳамжиҳатликка асосланган умумий қарорларгина жамият тараққиётини жадаллаштиради. Шунинг учун янгиланган Конституция доирасидаги ташаббусларда, хусусан, Қурултой институтини шакллантиришга оид таклифларда фаол иштирок этиш ҳар биримизнинг муқаддас бурчимиздир.