Жорий йил «Жанубий Қозоғистон» вилоят ижтимоий-сиёсий газетаси нашр этилаётганига 35 йил тўлади. Шу муносабат билан таҳририят йил давомида 35та тадбир ўтказишни режалаган. 

Янги йилнинг илк ҳафтасида Туркистон шаҳридаги «Дўстлик уйи»да шаҳар ва туман ўзбек этномаданият бирлашмалари ўртасида ақл гимнастикаси бўлган шахматдан мусобақа уюштирилди ва бу тадбир 35та эзгу ишнинг дебочаси бўлди. Мусобақа Туркистон вилоят ўзбек этномаданият бирлашмаси раиси Баҳодир Ирисметов ташкилотчилигида уюштирилди.

Турнирда иштирок этиш учун аслида 14та жамоа рўйхатдан ўтган эди. Лекин об-ҳаво ноқулайлиги сабабли, 8та – Туркистон ва Кентов шаҳарлари, Сайрам, Саврон, Қазиғурт, Мақтаарал туманлари ҳамда «Жанубий Қозоғистон» газетаси жамоалари иштирок этди.

Тадбирни вилоят Ижтимоий тараққиёт бошқармаси раҳбарининг вазифасини вақтинча бажарувчи Бўлат Жанабил, «Жамоат тотувлиги» ташкилоти раҳбари Элмира Жанғазиева очиб, газетанинг тарихи ва жамиятда тутган ўрни ҳақида фикр билдириб, турнир иштирокчликларига муваффақият тилашди. Шунингдек, тадбирда «Жанубий Қозоғистон» газетаси муҳаррири Райимжон Алибоев, ўринбосари Муроджон Абубакиров, «Дўстлик» ҳамжамияти раиси муовини Саид Хайруллоҳ, Туркистон ва Саврон туман ўзбек этномаданият бирлашмалари раислари Райимжон Қўчқоров ва Қурбонбой Ирисбеков иштирок этди.

Қизиқарли ва тортишувларга бой ўтган мусобақа якунида Сайрам тумани жамоаси 1-ўринни эгаллади. 2-ўринга – Саврон тумани, 3-ўринга эса Кентов шаҳри жамоаси сазовор бўлди. 

Шахмат мусобақасига Дониёрбек Тошметов ва Абдувоҳид Толипов ҳакамлик қилди. Уни ташкил қилишда беминнат ёрдамларини кўрсатган вилоят ЎЭМБ раисининг ўринбосари Замир Муҳаммаджонов ва бирлашманинг спорт ишларига масъул Зокир Бекенов ҳамда ҳомийлик ёрдамлари учун уста-ҳунарманд Носир Ҳамроқулов, Туркистон шаҳар маслаҳати депутати Дониёр Аюповларга миннатдорчилик билдирамиз. 

Бундан ташқари, мусобақа иштирокчиларига тушлик дастурхони уюштирган «ВІR JER» тамаддихонаси (раҳбари Дилмурод Ҳолиқов) жамоасига ташаккуримиз чексиз.