Қозоғистон Республикаси Сенати ташаббуси билан ўтказилаётган “Senat Open III” очиқ турнирининг 1/8 финали доирасида 22 февраль куни Қажимуқан номидаги марказий ўйингоҳда тезкор шахмат бўйича оммавий ахборот воситалари вакиллари ва блогерлар орасида Шимкент шаҳар чемпионати ўтди. 

Нуфузли мусобақада “Жанубий Қозоғистон” ижтимоий-сиёсий газетасидан Хуршид Қўчқоров, Собиржон Исаметов ва Малика Элтоева муваффақиятли иштирок этишди.

Турнирни шахмат жонкуяри, “Еркін ой” газетаси бош муҳаррири Балтабек Туйетаев очиб, иштирокчиларга муваффақият тилади. Мусобақада шаҳримизнинг журналистика соҳаси ва ижтимоий тармоқ юритувчиларидан иборат 38 нафар шахматчи қатнашди. 

Малика Элтоева хотин-қизлар ўртасида 1-ўринни эгалласа, Х. Қўчқоров ва С. Исаметовлар 4 апрель куни Кўргазмалар залида ўтадиган финал босқичига йўлланма олишди.

Эркаклар ўртасида 1-ўринни Берик Қўшжанов, блогер (35000 тенге), 2-ўрин Султан Садиқов, журналист (30000 тенге), 3-ўрин Аслбек Туйетаев, журналист (25000 тенге) эгаллади. 4-ўринни эгаллаган Нурдаулет Ўспанов (20000 тенге) ва 5-ўринга сазовор бўлган Балтабек Туйетаевларга (15000 тенге) ҳам фахрий ёрлиқ ва пул мукофотлари топширилди.

Турнир директори Сейитжамал Супбаев, бош ҳакам Василий Шимелков, фахрий журналист, шахмат жонкуяри Балтабек Туйетаев ғолиб ва совриндорларни қутлаб, фахрий ёрлиқ, медаль ва пул мукофотларини топширишди.