1989 йил 21 октябрда ўзбек тилига давлат тили мақоми берилиши йўлида улкан хизмат кўрсатган тилшунос олим Бахтиёр Исобек (Ўрдабекли) 80 ёшида оламдан ўтди. 

Бахтиёр Исобек 1945 йилда Қозоғистон Республикасининг Чимкент вилояти, Султонработ қишлоғида туғилган. 1961-1966 йилларда Низомий номидаги Тошкент Давлат Педагогика институтининг (ҳозирги педагогика университети) тарих-филология факультетини тамомлаган.

Меҳнат фаолиятини 1966 йили Ўзбекистон Фанлар академиясида лаборант сифатида бошлаган. 1968-1993 йилларда собиқ ТошДУ (ҳозирги Ўзбекистон Миллий университети)да ўқитувчи ва доцент лавозимларида фаолият юритган. 1980 йилларнинг охирларида ўзбек тилига давлат тили мақоми берилишини талаб қилиб чиққан зиёлилардан бири бўлган ва бу ҳаракатларда унинг талабалари ҳам фаол иштирок этган.

1993 йилда демократик қарашлари сабабли ишдан четлатилган Исобек нафақага чиққунга қадар ишсиз қолган. У ўз хотираларида тил масаласи билан боғлиқ ҳаракатларда “Бутун калтак ўз бошимда синди”, деб ёзган.

“Ўзбек тилининг давлат тили бўлиши учун мен каби кўп одам азоб тортган, аммо бутун калтак менда синган. Кейин эса ўзбек тилига давлат тили мақоми берилишида ташаббус кўрсатганлар кўпайиб кетди. Майли, яхши ишнинг соҳиблари кўп бўлади. Миллатнинг биринчи белгиси – тил. Агар тилнинг ўлмаслиги учун ҳаракат қилган одамни кўрсангиз, билингки, у миллатнинг ўлмаслиги учун ҳам ҳаракат қилган инсондир”, деган эди у.

Бахтиёр Исобек университетда ишлаган даврда ҳам ижодий ва илмий фаолиятни тўхтатмаган. Унинг илк китоби 1984 йилда профессор Иристой Қўчқортоев билан ҳамкорликда ёзилган ва нашр этилган “Туркий филологияга кириш” қўлланмасидир. 1995 йилда “Сайрам” рисоласини, 2006 йилда эса Қозоғистондаги ўзбек мактабларининг 10-синфи учун “Ўзбек тили” дарслигини ёзган. Шунингдек, “Султонработ”, “Эрк йўлида”, “Туркшуносликка кириш”, “Қизиқарли она тили”, “Ўғузнома”, “Яссавий ҳикматлари луғати” каби ўнлаб асарлар муаллифи, “Яссавий насабномаси ва Амир Темур” китобига сўзбоши ёзган.

Aтоқли муаррих ва шарқшунос олим, Туркистон ва Марказий Осиё тарихи соҳасида улкан тадқиқотлар соҳиби бўлмиш Боймирза Ҳайитнинг “Туркистон Россия ва Хитой оралиғида”, Фуод Кўпрулунинг “Турк адабиётида илк мутасаввифлар”, Лев Гумилёвнинг “Қадимги турклар” асарларини ҳамда қозоқ ёзувчиси Ўлжас Сулейменовнинг “Аз и Я” китобини ўзбек тилига таржима қилган.

Олимнинг шу кунга қадар бешта илмий асари ва 200дан зиёд мақолалари чоп этилган. У Маҳмуд Қошғарий номидаги халқаро мукофот соҳибидир. Устоз вилоятимиздаги “Ижодкор” адабий бирлашмаси таъсис этган Юсуф Сарёмий номидаги халқаро мукофот соҳиби ҳам бўлган.

Ўзбек халқи ва олимнинг барча яқинларига чин дилдан таъзия изҳор этамиз.