ҚР Президенти Қ. Тўқаевнинг «Қозоғистон сунъий идрок даврида: долзарб масалалар ва уларнинг ечими – рақамли ислоҳотлар орқали»  мавзуидаги Қозоғистон халқига Мактуби мамлакатимизнинг келгусидаги тараққиёт йўналишини белгилаб берди. Бугунги кунда сунъий идрок ва рақамли технологиялар дунё тараққиётининг асосий омилига айланмоқда. Қозоғистоннинг дунёвий рақобатда муносиб ўрин эгаллаши, инновацион иқтисодиёт барпо этиши айнан шу соҳадаги ташаббусларга боғлиқ.

Мактубда белгиланган устувор вазифалар – рақамли инфратузилмани ривожлантириш, таълим тизимини замон талабига мослаштириш, айниқса, ёш авлодда рақамли саводхонлик ва илмий ижодкорликни шакллантириш муҳим аҳамиятга эга. Зеро, мазкур ўзгаришлар келгусида янги авлод мутахассисларини тайёрлаш, рақамли иқтисодиётда юксак натижаларга эришиш учун мустаҳкам замин яратади.

Шу билан бирга, сунъий идрок имкониятларидан фойдаланишда ахборот хавфсизлиги, шахсий маълумотларни ҳимоя қилиш ва миллий манфаатларни таъминлаш масаласи ҳам долзарб эканлиги таъкидланди. Бу йўналишда давлат органлари билан бирга жамият, илм-фан ва бизнес ҳамкорлиги катта аҳамиятга эга бўлади. Президентнинг мазкур Мактуби Қозоғистонни янги рақамли босқичга олиб чиқиш, мамлакатимизни сунъий идрок даврининг илғор давлатлари қаторига қўшиш йўлидаги дастуриламал ҳужжат ҳисобланади. Бу барчамиздан фаоллик, билимга интилиш ва янгича фикрлашни талаб этади.

Мактубда сиёсий ислоҳотлар қаторида бир палатали Парламентга ўтиш масаласи ҳам айтилди. Бу ташаббус қонун чиқарувчи ҳокимият самарадорлигини ошириш, ортиқча қоғозбозлик, расмиятчиликни қисқартириш ва халқ билан Парламент ўртасидаги мулоқотни соддалаштиришга қаратилган. Бир палатали Парламент тизими мамлакатда қонунларни тезкор қабул қилиш, масъулиятни аниқлаш ва демократик жараёнларни кучайтириш имконини беради. Шу билан бирга, халқнинг ташаббуслари ва таклифларини амалдаги қонунчиликда ифода этиш жараёни енгиллашади.