Оқсувкент қишлоғидаги Қ. Жандарбеков номли Маданият уйида Сайрам туман ўзбек этномаданият бирлашмасининг ҳисобот-сайлов қурултойи ўтди.

Тадбирни Сайрам туман маслаҳати раиси Ш. Холмуродов очиб, йиғилиш кун тартиби билан таништирди. Сўнг мазкур жамоат ташкилотини 2017 йилдан буён бошқарган Ғ. Раимқулов ҳисобот бериб, ўтган даврда амалга оширилган ишларга тўхталди. У туман ЎЭМБ раиси вазифасидаги фаолиятини якунлашини маълум қилди.

Шундан сўнг Ҳ. Худойқулов, Н. Сайдазимов, Н. Аҳмедов, З. Юсупов каби ЎЭМБ фаоллари, шунингдек, У. Каримова, О. Режаметова, Р. Мусаева, С. Зиёбекова, Т. Пирназарова каби таниқли ижодкорлар “Дўстлик” ҳамжамиятига – 30 йил” кўкрак нишони билан тақдирландилар. 

Тадбир иштирокчиси, жамоат фаоли Р. Юсуповнинг таклифига биноан туман ЎЭМБ раиси этиб бир овоздан “Ойша биби” мактаби директори Шопўлат Бойменов сайланди. Тадбирда сўз олган Ш. Бойменов юксак ишонч учун иштирокчиларга миннатдорчилик билдириб, туман ўзбек этномаданият бирлашмаси раиси сифатида самарали фаолият юритган Ғ. Раимқуловнинг кифтига зарбоф тўн ёпди. Таниқли сухандон, фахрий устоз Ҳамроқул Давронбеков янги раиснинг фаолиятига зафар тилади. 

Тадбир якунида “Дўстлик” жамжамиятининг ҳисобот-сайлов қурултойида Сайрам туманидан иштирок этадиган 32 нафар делегатнинг номзоди якдиллик билан тасдиқланди.

Маълумот учун: Шопўлат Бойменов (тасвирда) 1967 йили 18 февралда Манкент қишлоғида туғилган. Тошкент Давлат Университетини тамомлаган.

Меҳнат фаолиятини 1991 йили З. Космедемьянская номли мактабда бошлаб, турли йилларда Оқсувобод қишлоғидаги М. Қошғарий номли, Оқсувкент қишлоғидаги 47-сонли ва Бобур номли мактабларнинг директори вазифаларини муваффақиятли уддалаган. Бугунги кунда “Ойша биби” мактабини бошқармоқда. Шу кунгача Манкент қишлоқ ЎЭМБ раиси сифатида хизмат қилиб келган.