1 март куни Қозоғистонда Шукрона куни нишонланди. Ушбу байрам юртимизда халқ бирлиги, ўзаро ҳурмат ва тотувлик тимсолига айланган. Байрам арафасида ҳарбийлар анъанага мувофиқ, Улуғ Ватан уруши фахрийси Қалмен Муратовнинг хонадонига ташриф буюришди.

Фахрийнинг уйида Ўрдабоши тумани Мудофаа ишлари бўлими раҳбари подполковник Бақдаулет Ташпўлатов ўринбосари билан бирга бўлиб, Қозоғистон Республикаси Мудофаа вазири, авиация генерал-лейтенанти Даурен Қўсановнинг табрик хатини топширди. Унда фахрийларнинг матонати ёш авлодга руҳий қувват бағишлаши таъкидланган. Меҳмонлар Ватан ҳимоячилари номидан Қалмен отага Она Ватан мудофааси, Буюк Ғалабага қўшган ҳиссаси учун миннатдорчилик билдирдилар. Жорий йилда фахрий 102 ёшга тўлди. Қалмен Муратов иззат-ҳурмат учун раҳмат айтиб, мустақил Қозоғистонга тинчлик, осойишталик ва барқарорлик тилади.

– Юртимизнинг осмони ҳамиша мусаффо бўлсин. Ҳозирги авлод бахтли, сабаби улар тинч мамлакатда, мустақил давлатда умргузаронлик қилмоқда, – деди у. 

1942 йилда Қалмен Муратов Аягўз шаҳридаги кичик командирлар тайёрлаш курсини тамомлаб, сержант унвонини олди. Фронтга бориш аризаси бир неча марта рад этилди, у зобитларни тайёрлаш курсларида таҳсил олди. Кейинчалик Белорусь фронтига йўлланади. 1944 йилда Витебск остонасидаги жангларда жароҳатланиб, II гуруҳ ногирони сифатида уйига қайтди. У “Германия устидан қозонилган ғалаба учун” медали ва бошқа байрам медаллари билан тақдирланган. 

Қалмен ота урушдан сўнг узоқ йиллар давомида “Бөржар” жамоа хўжалигида бригадир сифатида меҳнат қилди, кейинчалик темирйўл соҳасида фаолият юритди. Турмуш ўртоғи билан олти ўғил, икки қиз тарбиялаб, вояга етказди. Бугунги кунда фахрий отахон 31 набира ва 34 чевара ардоғида.