Шимкент шаҳридаги «Бомонд 777» тўйхонасида ифторлик уюштирилди. Тадбир Қозоғистон ўзбеклари «Дўстлик» ҳамжамияти раиси Абдулла Исматуллаев ташаббуси билан ўтказилди.

Унда мамлакатимизнинг барча вилоят, шаҳар ва туманларидан ўзбек этномаданият бирлашмалари раислари, фаоллари, жамоат арбоблари иштирок этди. Тадбирни таниқли жамоат арбоби Шалатай Мирзахметов очиб, муборак Рамазон ойи билан барчани табриклади ва турли миллат вакилларини бир дастурхон атрофига жамлаган муборак Моҳи Рамазон эзгуликлар ойига айланишини тилади. Шунингдек, у ибодат ва саховат ойида икки қардош халқ ўртасидаги дўстона муносабатларнинг ришталарини янада мустаҳкамлаш, айниқса, саховат ойида ҳамжиҳатлик руҳини янада кучайтириш, осойишталик ва жамият тараққиётининг муҳим омили эканлигини таъкидлади. Ҳамжамият раиси Абдулла Исматуллаев, унинг фахрий раиси Икромжон Ҳошимжонов, Оқсоқоллар кенгаши раиси Орифжон Холназаров сўзга чиқиб, қутлуғ ой билан табриклаб, барчага тинчлик, осойишталик ва барқарорлик тиладилар. 

Мамлакатимизнинг олис-яқин вилоятларидан ташриф буюрган ЎЭМБлари фаоллари ҳам сўзга чиқиб, эзгу ниятларини изҳор этишди. Ҳамжамият ҳузуридаги Оналар кенгашининг фахрий раисаси Фароғат Ҳожиматова, ҳамжамият раиси ўринбосарлари Ғани Каримов, Шимкент шаҳар ЎЭМБ раиси Тоҳир Нишонбоев, «Жанубий Қозоғистон» вилоят ижтимоий-сиёсий газетасининг бош муҳаррири ўринбосари Муроджон Абубакиров ва бошқалар сўзга чиқиб, шукуҳли Рамазон билан табриклаб, юртимизга барака ва осойишталик тилашди. 

Шимкент шаҳар бош имом-хатиби Бақдаулет Нурматули ва Туркистон вилояти бош имом-хатиби Ержан Сматули сўзга чиқиб, саховат ва меҳр-оқибат ойида муҳтожларга ёрдам қўлини чўзиш, кам таъминланган оилалар ҳолидан хабар олиш орқали ҳамюртларимиз улуғ савобларга эга бўлишларини алоҳида таъкидлаб, Қуръон тиловат қилишди. Тадбир якунида иштирокчилар бундай маънавий учрашувлар миллатлараро дўстликни мустаҳкамлашга хизмат қилишини қайд этиб, эзгу ишларни давом эттиришга чақирдилар.