2025 йил 24 майдан бошлаб уй-жой сиёсатига киритилган ўзгаришларга мувофиқ, фуқароларни уй-жой навбатига қўйиш ва уни мувофиқлаштириш ваколати «Отбасы банк» ҳиссадорлик жамиятига ўтказилди. Эндиликда уй-жойга муҳтожлар барча мурожаат ва аризаларини банк орқали расмийлаштира олади.

Янги тартибга кўра, навбатда турган фуқаролар «Уй-жой билан таъминлаш маркази» ахборот тизимидаги шахсий кабинети орқали маълумотларини тасдиқлаши шарт. Вилоят бўйича 69 119 нафар фуқаро қайта рўйхатдан ўтиши керак бўлса, ҳозирга қадар 33 028 нафари (47,8 фоиз) ҳужжатларини расмийлаштирган. Айрим ҳудудларда, жумладан, Aрис шаҳри ва Ўрдабоши туманида кўрсаткич пастлигича қолмоқда.

Маълумотларга кўра, ҳозирда вилоятда 113 536 нафар фуқаро уй-жой навбатида турибди. Навбатдагиларнинг асосий қисмини кўп болали оилалар ҳамда I-II гуруҳ ногиронлиги бўлган шахслар ташкил этади.

Шунингдек, 1 953 оила ижара тўловини субсидиялаш дастури билан қамраб олинган. 2026 йил учун бу мақсадга вилоят бюджетидан 500 миллион тенге ажратиш режалаштирилган.

Масала вилоят ҳокими Нуралхан Кўшеров раислигида ўтган йиғилишда муҳокама қилиниб, уй-жой навбатини тартибга солиш ва тайёр хонадонларни қонун талаблари асосида ўз вақтида тақсимлаш юзасидан аниқ топшириқлар берилди.