Тараз шаҳридаги “Дўстлик уйи”да ҚР “Дўстлик” ҳамжамияти ташаббуси билан, Жамбил вилоят ўзбек этномаданият бирлашмаси томонидан “Тўйларимиз ҳақида ўйларимиз” мавзуида маърифий-тарбиявий семинар ўтди. 

Тадбир миллий қадриятларимизни асраб-авайлаш, урф-одатларимизни ёш авлодга етказиш ҳамда жамият ҳаётидаги долзарб муаммоларни ўзаро ҳамжиҳатлик асосида муҳокама қилишга қаратилгани билан алоҳида аҳамият касб этди. Тадбирда “Дўстлик” ҳамжамияти раиси муовини Ғани Каримов, Жамбил вилоят ўзбек этномаданият бирлашмаси раиси Набижон Салоҳиддинов 15 март – конституциявий ислоҳотлар бўйича референдумнинг моҳияти борасида фикр билдириб, барчани фуқаролик бурчини адо этишга чақирдилар. 

Оқсоқоллар томонидан билдирилган фикр-мулоҳазалар, мазмунли маърузалар ва ҳаётий тажрибалар иштирокчиларда қизиқиш уйғотиб, жамоатчилик эътиборини ўзига жалб этди. Шу билан бирга, Жамбил вилояти ЎЭМБ қошидаги оқсоқоллар кенгаши раиси Ғ. Ҳасанов, тадбиркорлар палатаси раиси Т. Зокиров ҳамда спорт ва маданият бўйича раис маслаҳатчиси Н. Абдуллаевлар тўй маросимлари ва аза-жаноза тадбирларини тартибга солиш, ортиқча исрофгарчиликнинг олдини олиш, миллий анъаналаримизга ёт бўлган урф-одатларга чек қўйиш каби масалалар юзасидан мазмунли фикрларни илгари сурдилар. Ўзаро мулоқот шаклида ўтган семинар жонли мулоқот майдонига айланди.