Сайрам тумани маркази – Оқсувкент қишлоғида жойлашган Қ. Жандарбеков номли Маданият уйида ҚХА қошидаги Оналар кенгашининг вакиллиги, яъни ҚР “Дўстлик” ҳамжамияти таркибидаги республика Оналар кенгаши “Біртұтас тәрбие” (“Ягона тарбия”) лойиҳаси доирасида семинар-кенгаш ўтказди.

Унинг мақсади – жамиятдаги ижтимоий иллатлар, жумладан, гиёҳвандлик, қиморбозлик, оила ва жамиятдаги зўравонлик, бузғунчилик ва исрофгарчиликка қарши курашишга ҳисса қўшиш, минтақаларда Оналар кенгашларини бошқараётган вакилаларга зарур билим ва кўникмаларни беришдан иборат. Иштирокчиларга тажриба, тадқиқот, ахборот, тарғибот усулларидан фойдаланилган ҳолда, мажмуавий билим ва ахборотлар берилди. 

Тадбирнинг кириш қисмида меҳмонларга кенгаш томонидан амалга оширилган чора-тадбирлар намойиш этилди. ҚР “Дўстлик” ҳамжамиятининг Оналар кенгаши раисаси, Сайрам туманининг фахрий фуқароси, Анвар Исмоилов номидаги касб-ҳунар коллежи директори Гулчеҳра Исмоилова тадбирни очаркан, нотиқларни таништирди. Семинар ишида ҳамжамият раиси Абдулла Исматуллаев, унинг гендер масалалар бўйича бош маслаҳатчиси, Шимкент шаҳар Оналар кенгаши раисаси Фароғат Ҳожиметова, вилоят ЎЭМБ раиси муовини Бахтиёр Шомуродов, Сайрам тумани “Жамоат тотувлиги” ДКК раҳбари Базарбай Айтбаев, Сайрам туман ЎЭМБ раиси Шопўлат Бойменов, Сайрам туман маслаҳати депутати Муҳиддин Сидиқов ва бошқалар иштирок этишди ва ўз тилакларини билдиришди. Семинарни республика Оналар кенгаши раисаси муовини, “Өрлеу” ўқитувчилар малакасини ошириш миллий марказининг минтақавий ваколатхонаси катта ўқитувчиси Маҳфуза Мусаева олиб борди. 

Навбат бир-биридан қизиқарли маърузаларга берилгач, “Ёшларни салбий унсурлардан муҳофаза қилиш усуллари” мавзуида тадбир ташкилотчиларидан Сайрам тумани ЎЭМБ қошидаги Оналар кенгаши раисаси, Сайрам туманининг фахрий фуқароси, ҚР Таълим аълочиси Зумрад Аҳмедова маъруза қилди. У ёшлар ўртасида авж олаётган ижтимоий муаммолар ҳақида гапираркан, 18-30 ёш оралиғидагиларнинг шиддат-шижоатини, замонавий фикрлашини муайян касб-ҳунарларни эгаллашга йўналтириш зарурлигини таъкидлади. Барқарор тараққиётга ҳалақит бераётган иллатлардан қутулиш йўлларини, ечимларини тавсия этди.  

“Ёшлар тарбиясида алоҳида услублар” мавзусида Манкент қишлоқ Оналар кенгаши раисаси, қишлоқ бийи, халқаро медиатор Сайёра Довонова маъруза қилди. У минтақа ёшларининг ҳуқуқлари, имкониятлари, уларнинг тарбиясида самарали ҳамкорликни йўлга қўйиш каби масалаларга тўхталди.

 “Янги технологиялар асрида оналикнинг аҳамияти” мавзусини Анвар Исмоилов номидаги касб-ҳунар коллежи руҳшуноси, ўқитувчи-тадқиқотчи, педагогика фанлари магистри Майра Шўнкебаева ёритиб берди.

Семинарда Тараз, Туркистон, Шимкент шаҳарлари ва қатор туманлардан ташриф буюрган иштирокчилар ажойиб савол-жавобларнинг гувоҳи бўлишди.

Тадбир давомида руҳшунослар маҳорат сабоқларидан сўнг коллеж устозлари Айгерим Ўнғарбаева, Раънохон Аҳмедова “Сақ бике” театрлаштирилган саҳна кўринишини намойиш этишди, педагог-тадқиқотчи Ғ. Абдиғапарова эса “Она” монологини ижро этди. 

Гулчеҳра Исмоилова ушбу семинар орқали, умуман Оналар кенгаши саъй-ҳаракатлари ила Қозоғистонда, энг аввало, тинчлик-хотиржамлик, миллатлараро тотувлик барқарорликни таъминлашга ҳисса қўшиш, Президент Қасим-Жўмарт Тўқаев томонидан илгари сурилган гиёҳвандлик, қимор ўйинлари, оила ва жамиятдаги зўравонлик, бузғунчилик ва исрофгарчиликнинг барҳам топишига эришиш йўллари, бу жараёнларда ёшларнинг амалий иштирокини ҳам таъминлаш борасидаги фикрларини ҳамжамият эътиборига ҳавола қилди.   

Кенгашнинг ишида фаол иштирок этган коллеж ходимлари Нилуфар Авазхон қизи, Улпан Абзелова, Ирисой Ғаипова, Мавлуда Шодиева, Ақида Шотемирова, меҳмонлардан Муҳаббат Иброҳимова, Гулҳаёт Аҳмедова, Манзура Аҳмедова, Нодира Йўлдошева, Раҳбар Отаметова, Нурбуви Имомсаидова ва бошқа илғорлар фаолиятини алоҳида қайд этиш жоиз. 

Оналар кенгаши аъзолари янги иш-режалар, илғор ташаббуслар ва лойиҳалар билан йилни самарали бошлади. Истиқболда ёшлар ҳаётига оид тадбирларни муносиб давом эттириш вазифаси мужассам.