Шимкент шаҳрида ўтган халқаро ижодий, кўп жанрли “Дарын – 2026” фестиваль-танлови кўтаринки руҳ ва юксак савияда ташкил этилди. Нуфузли анжуман ёш истеъдодларни қўллаб-қувватлаш, уларнинг ижодий салоҳиятини янада юксалтириш ҳамда халқлар ўртасидаги маданий алоқаларни мустаҳкамлашга хизмат қилди.

Фестивалда турли давлатлардан келган болалар, ёшлар ва ижодий жамоалар ўз маҳоратларини намоён этдилар. Танловнинг асосий мақсади – иқтидорли ёшлар ва уларнинг устозлари ўртасидаги самарали ҳамкорликни ривожлантириш, санъатга меҳр ва садоқатни мустаҳкамлашдан иборат эди.

Мазкур анжуманда Сайрам даҳасидаги М. Маметова номли 111-сонли мактаб ўқувчиси Давлат Зоҳидваев ўзининг бетакрор истеъдоди ва юксак ижро маҳорати билан иштирок этиб, “Қўрқит қўбиз” номли қозоқ халқ қўшиғини маҳорат билан куйлади. Унинг юракдан чиққан самимий ижроси ҳакамлар ҳайъати ва томошабинларда чуқур таассурот қолдирди. Натижада у танловнинг энг олий мукофоти – Бош совринга муносиб деб топилди.

Ёш санъаткорнинг ушбу улкан ютуғида унинг устози Собиржон Турғунбоевнинг беқиёс меҳнати ва фидокорона саъй-ҳаракатлари муҳим ўрин тутди. Устоз ва шогирд ўртасидаги ишонч ва самарали ҳамкорлик бу ғалабанинг асосий омилларидан бири бўлди.

Бу ютуқ – изланиш, матонат, сабр-тоқат ва юксак орзулар сари интилишнинг ёрқин намунасидир. Ишонамизки, ёш истеъдод келгусида ҳам янги марраларни забт этиб, Ватанимиз шарафини халқаро саҳналарда муносиб ҳимоя қилади. Бу ютуқ ёш истеъдод эгаси – Давлат Фаррух ўғлининг келажакдаги муваффақиятлари учун асос бўлади.