Сайрам туманининг Орис қишлоғидаги “Ассалом” тўйхонасида қишлоқ тадбиркорлари ҳомийлигида Янги йилга бағишланган худойи ўтказилди.

Унда дастлаб сўз олган Сайрам тумани ҳокимининг ўринбосари Сержан Дуйсебаев барчани туман ҳокими номидан кириб келаётган Янги йил байрами билан муборакбод этди. У 2025 йилда Орис қишлоғида амалга оширилган ишлар бисёрлигини, 2026 – От йилида ҳам залворли ишлар режаланганлигини таъкидлади.

Шундан сўнг яқинда ўтган сайловда қишлоқ ҳокими этиб сайланган Иристой Ортиқов, туман маслаҳати депутати Камолиддин Тожиевлар сўзга чиқиб, қишлоқ аҳлига эзгу тилакларини изҳор этдилар. Тадбирда, шунингдек, қишлоқ оқсоқоллари, жамоат фаоллари, тадбиркорлар, этномаданият бирлашмалари аъзолари, Семей ядро полигони ҳамда Афғон уруши фахрийлари, уйда ижтимоий ёрдам олаётган ногирон фуқаролар, таълим соҳаси вакилларига самимий ниятларини изҳор этишди.

Тадбирда “Жанубий Қозоғистон” вилоят газетаси бош муҳаррири ўринбосари Муроджон Абубакиров ва Сайрам тумани бўйича махсус мухбир Зокиржон Мўминжоновлар сўзга чиқиб, орисликларни Янги йил билан қутладилар ва бир гуруҳ фаол обуначиларга ташаккурномалар топширдилар.

Байрам тадбири концерт дастури билан давом этиб, санъаткорлар ўз ижод намуналарини тақдим этдилар. Дастур меҳмонларга кўтаринки кайфият бағишлади.