Наврўз қадимдан бизгача етиб келган миллий қадриятларимиздан бири – байналмилал байрамдир. Унинг таркибига ота-боболаримизнинг маънавият олами сингиб кетган бўлиб, у инсоният маданий тараққиётининг ҳар бир ютуғидан доимо куч-қувват олиб турган. Шуни таъкидлаш жоизки, халқимиз маънавиятини юксалтиришда миллий урф-одатларимиз ва уларнинг замирида мужассам бўлган меҳр-оқибат, инсонни улуғлаш, тинч ва осойишта ҳаёт, дўстлик ва тотувликни қадрлаш, турли муаммоларни биргалашиб ҳал қилиш каби ибратли қадриятлар тобора муҳим аҳамият касб этмоқда. 

Бу куни вужудга келган руҳий кўтаринкилик кишиларни эртанги кунга яхши умидлар боғлашга, порлоқ келажакка ишонч билан қарашга, ҳаётни янада гўзал қилишга ундайди.

САЛОМЛАШИШ КУНИ

Бу кун одамлар ўртасидаги меҳр-оқибат, ҳурмат ва самимиятни мустаҳкамлашга бағишланади. Инсонлар бир-бирини илиқ сўзлар билан қутлаб, яхши ниятлар билдиради.

ХАЙРИЯ КУНИ

Ушбу кунда саховат ва меҳр-шафқат фазилатлари улуғланади. Эҳтиёжмандларга ёрдам кўрсатиш, савобли ишлар қилиш орқали жамиятда инсонпарварлик қадриятлари тарғиб этилади.

ЧАНҒАРОҚ КУНИ

Чанғароқ – оила бирлиги ва уй-рўзғор рамзи. Бу кун оилавий қадриятлар, авлодлар давомийлиги ва хонадон тинчлигини қадрлашга бағишланади.

МАДАНИЯТ ВА МИЛЛИЙ УРФ-ОДАТЛАР КУНИ

Халқимизнинг бой маънавий мероси, анъаналари ва урф-одатлари тарғиб қилинади. Миллий қадриятлар, халқ санъати ва маданий меросга ҳурмат ифодаланади.

МИЛЛИЙ ЛИБОС КУНИ

Бу кунда халқнинг миллий кийимлари, уларнинг тарихи ва нафосати намоён этилади. Миллий либослар орқали маданий ўзига хослик ва гўзаллик қадрланади.

ЯНГИЛАНИШ КУНИ

Табиатнинг уйғониши, ҳаётнинг янгиланиши рамзи сифатида нишонланади. Инсонлар янги режалар ва эзгу ниятлар билан келажакка қадам қўяди.

МИЛЛИЙ СПОРТ КУНИ

Миллий ўйинлар ва анъанавий спорт турлари кенг тарғиб қилинади. Бу кун соғлом турмуш тарзини рағбатлантириш ва ёшларни жисмоний фаолликка чорлайди. Бу куни барча ҳудудлардаги спорт мажмуалари ва отчопарларда миллий спорт турлари бўйича мусобақалар ўтказилади.

ҲАМЖИҲАТЛИК КУНИ

Жамиятда бирлик, дўстлик ва ўзаро ҳурмат қадриятлари улуғланади. Турли миллат вакиллари ўртасидаги тотувлик ва ҳамжиҳатлик мустаҳкамланади.

ЙИЛ БОШИ

Наврўз – янги йилнинг бошланиши, табиат ва ҳаётнинг янги даври рамзи. Бу кун барчага янги умидлар, барака ва фаровонлик тилаш билан нишонланади. Бу куни вилоят маркази – Туркистон шаҳри ҳамда барча туман ва шаҳарлардаги марказий майдон ва истироҳат боғларида кўргазмалар, концерт дастурлари, миллий спорт ўйинлари байрамга файз бағишлайди.

ПОКЛАНИШ КУНИ

Инсон ва атроф-муҳит поклигини асраш ғояси илгари сурилади. Одамлар қалбан ва жисмонан покланиб, табиатга ғамхўрлик қилишга чақирилади. Бу куни вилоят миқёсида умумхалқ сайиллари ташкил этилиб, туман ва шаҳарларда тозалаш ишлари олиб борилади.