Kazinform. “Дўстлик” ҳамжамияти ва этномаданият бирлашмаларининг ташаббуси маданий ранг-баранглик ва миллатлар тотувлигини яна бир карра намоён этди.

Қозоғистон халқи Ассамблеясининг 30 йиллиги доирасида Шимкент шаҳри марказий истироҳат боғи янада гўзал манзара касб этиб, шодлик ва тантана майдонига айланди. Бу ерда Қозоғистон Республикаси ўзбекларининг “Дўстлик” этномаданият бирлашмалари ҳамда “Дўстлик” ҳамжамияти ташаббуси билан “Ўзбек тили, маданияти ва анъаналари куни” кенг нишонланди.

Байрамона тадбир Шимкент шаҳар ўзбек драма театри ижодкорлари саҳналаштирган Абай ва Алишер Навоий образларининг чиқиши билан очилди. Бу рамзий саҳна кўриниши икки халқнинг маънавий дунёси ва умумий қадриятларини яна бир бор ёдга солди. Шундан сўнг меҳмонлар миллий анъаналар, турли ҳунармандчилик буюмлари ва миллий қадриятлар намойиш этилган кўргазмаларни томоша қилдилар.

Тадбирда давлат ва жамоат арбоблари, нуфузли меҳмонлар иштирок этди. Жумладан, Қозоғистон Республикаси Парламенти Сенати депутати Алишер Сотволдиев, Қозоғистон халқи Ассамблеяси Котибияти шўъбаси мудири Қайрат Баймўлдинов, “Дўстлик” ҳамжамияти раиси Икромжон Ҳошимжонов, Шимкент шаҳар ички сиёсат ва ёшлар билан ишлаш бўлими раҳбарининг вазифасини бажарувчи Занғарбек Усупахметов, “Жамоат тотувлиги” жамоат ташкилоти раҳбари Нуркен Алимқулов, шаҳар ўзбек этномаданият бирлашмаси раиси Тоҳирбек Нишонбоев ва бошқалар тантана иштирокчиларига самимий тилакларини изҳор этдилар.

Маданий дастур жуда ранг-баранг бўлди. Муқимий номидаги 13-мактабнинг “Баҳор” рақс дастаси ўзбек ва қозоқ халқ рақсларини ижро этди. Шимкент шаҳар драма театри саҳнасида “Сары жайлау” композицияси намойиш этилди. Опера ва балет театри хонандаси Неъматилла Зикриллаев машҳур қўшиқлар – Тўлеген Мухамеджановнинг “Ватан”, А. Зацепиннинг “Тингла” тароналарини ижро этди. Шунингдек, театр актрисаси Шоҳиста Усмонова ўзбек халқ куйи – “Мустаҳзод”ни куйлаб, байрамга завқ бағишлади.

Шу куни бир гуруҳ фаоллар этномаданий алоқаларни мустаҳкамлашга қўшган муносиб ҳиссаси учун тақдирланди.

Алишер Навоийнинг “Дўстликдан кишилар топгай саодат”, деган пурҳикмат сўзлари бугунги тантана мазмунини янада теран ифода этди. Чунки байрам саҳнасидан Навоий ва Абай тимсоллари бирга намоён бўлиб, икки халқнинг умумий маънавий мероси, дўстлик ва бирлик ғояси жонланди.