Шимкент шаҳридаги “Дўстлик уйи”да Қозоғистон ўзбеклари этномаданият бирлашмалари “Дўстлик” ҳамжамиятининг навбатдаги VII қурултойи ўтди. Тадбирда Астана, Алмати, Шимкент шаҳарлари, Туркистон вилоятининг Сайрам, Саврон, Қазиғурт, Мақтаарал, Сариоғоч, Тўлебий, Тулкибош туманларининг вакиллари иштирок этди. Уни жамоат арбоби Зуппархон Чолдонов олиб борди.

Ҳамжамият раиси Икром Ҳошимжонов делегат этиб сайланган 136 нафар шахсдан 131 нафари иштирок этаётганини маълум қилди. 

Кун тартиби доирасида ҳамжамият томонидан амалга оширилган тадбирлар, бажарилган ишлар тўғрисида ҳисобот тақдим этилди.

Маъруза муҳокамасида сўз олган меҳнат фахрийси А. Абдазимов бажарилган ишларнинг залворли эканини таъкидлаб, И. Ҳошимжоновнинг фаолиятини “қониқарли” деб баҳолади.

Давлат ва жамоат арбоби Ш. Мирзахметов ўзбек ва қозоқ халқларининг дўстлиги тўғрисида гапирди.

ҚР Парламент Сенатининг депутати А. Сотволдиев бугунги кунда Давлатимиз раҳбарининг, айниқса, ёшларга кўпроқ эътибор қаратиш борасидаги топшириқлари амалга оширилаётганини таъкидлаб, ҳамжамиятнинг ишларини “яхши” деб баҳолади.

Делегатларнинг кўпчилик овози билан И. Ҳошимжонов фаолияти “қониқарли” деб баҳоланди. 

Шундан сўнг кун тартибидаги навбатдаги масала қаралиб, И. Ҳошимжонов ҳамжамият раислигига номзод сифатида таниқли тадбиркор, Алмати шаҳар ўзбек этномаданият бирлашмаси раиси бўлиб хизмат қилган Абдулла Исматуллаевнинг рўйхатга олинганини эълон қилди. 

Абдулла Жаъфар ўғли қурултой иштирокчиларига ўзининг режалари ҳақида сўзлаб берди ва билдирилган ишонч учун қурултой делегатларига миннатдорчилик изҳор этди. У, шунингдек, ҳамжамият раиси лавозимида 10 йилга яқин самарали фаолият юритган И. Ҳошимжоновнинг кифтига зарбоф тўн ёпди. И. Ҳошимжонов “Дўстлик” ҳамжамиятининг Фахрий раиси этиб сайланди.

Шундан сўнг ҳамжамиятнинг тафтиш комиссияси ҳамда 65 кишидан иборат Кенгаш аъзолари бир овоздан сайландилар. 

Қурултойнинг кўтаринки руҳда ўтганини алоҳида таъкидлаш жоиз.