Минтақа раҳбари Нуралхан Кўшеров Украина Республикасининг Қозоғистондаги Фавқулодда ва Мухтор элчиси Виктор Майко билан учрашди. Мулоқот чоғида савдо-иқтисодий ҳамда сармоявий ҳамкорликни ривожлантириш масалалари муҳокама қилинди.

Хусусан, ҳудудлараро алоқаларни мустаҳкамлаш, қўшма ишлаб чиқариш лойиҳаларини амалга ошириш, қишлоқ хўжалиги, саноат ва сайёҳлик соҳаларида ҳамкорликни кенгайтириш имкониятларига алоҳида эътибор қаратилди.

2025 йил якунларига кўра, Туркистон вилояти билан Украина ўртасидаги товар айирбошлаш ҳажми 10,5 миллион АҚШ долларига етди. Хусусан, экспорт – 0,5 миллион доллар, импорт эса – 10 миллион долларни ташкил этди. Қозоғистондан Украинага асосан нефть, металл, кимё маҳсулотлари, қишлоқ хўжалиги товарлари ва кўмир экспорт қилинади. Ўз навбатида, Қозоғистон Украинадан юқори технологияли ускуналар, дори-дармонлар ва бошқа маҳсулотларни импорт қилади.

Вилоят раҳбари Туркистоннинг сармоявий салоҳияти, агросаноат ва сайёҳлик соҳаларидаги имкониятлари ҳақида маълумот бериб, қўшма лойиҳаларни амалга оширишга тайёр эканлигини маълум қилди.

Учрашув якунида томонлар ўзаро манфаатли ҳамкорликни янада ривожлантириш ва қўшма тадбирларни изчил давом эттириш юзасидан келишувга эришди.