Президент қароргоҳида мамлакат спорти тарихидаги муҳим воқеа – бадиий учиш бўйича жаҳон чемпионати ва Олимпия ўйинлари ғолиби Михаил Шайдоров ҳамда унинг мураббийлари тақдирланди.

Тантанали маросимда Давлат раҳбари Қасим-Жўмарт Тўқаев ушбу Олимпиада мамлакатимиз учун тарихий аҳамиятга эга эканини таъкидлади. Юртбоши Шайдоровнинг ғалабаси миллий спорт солномасига зарҳал ҳарфлар билан битилганини қайд этди.

Президентнинг таъкидлашича, бу – мамлакат бадиий учиш усталари қўлга киритган илк Олимпия олтини ҳамда 32 йил давомида кутилган тарихий натижа бўлди. ва мутахассисларнинг самарали меҳнати маҳсулидир.

Тантанали маросимда спортчининг биринчи мураббийи ва отаси Станислав Шайдоровнинг хизматлари алоҳида эътироф этилди. Шунингдек, халқаро миқёсда катта тажрибага эга мураббий Алексей Урманов ҳамда миллий терма жамоа мутахассислари, федерация ва ҚР Олимпия қўмитаси раҳбариятининг ҳиссаси қайд этилди.

Давлат раҳбари спорт соҳасини ривожлантириш мамлакат сиёсатининг устувор йўналишларидан бири эканини таъкидлаб, келгусида оммавий ва касбий спортни қўллаб-қувватлаш давом эттирилишини маълум қилди. Шу билан бирга, халқаро мусобақаларда эришилган натижалар давлат тараққиёти ва жамият салоҳиятининг муҳим кўрсаткичи экани қайд этилди.

Ўз нутқида Президент келгуси йирик спорт тадбирларига тўхталиб, спортчиларга омад тилади. Шунингдек, 2029 йилда Алмати шаҳрида ўтказиладиган қишки Осиё ўйинларига тайёргарлик масалаларига алоҳида эътибор қаратилиши таъкидланди.

Тадбир якунида Михаил Шайдоров ва мураббийларига давлат мукофотлари топширилди. 

Олимпия чемпиони ўз сўзида мамлакат раҳбариятига ва барча қўллаб-қувватлаган юртдошларга миннатдорлик билдирди ҳамда ғалаба келажакдаги янги ютуқлар учун масъулият эканини таъкидлади.

Шу тариқа, Олимпия ўйинларида қўлга киритилган ушбу ғалаба мамлакат спорт ҳаётида янги саҳифа очди ва ёш авлод учун юксак мақсадлар сари илҳом манбаига айланди.