Туркистон шаҳридаги «Дўстлик уйи»да ёшларнинг руҳий ва маънавий тараққиётига қаратилган «Таниқли шахс билан учрашув» мавзуида давра суҳбати ўтди.

Тадбирда минтақа ёшлари, жамоат ташкилотлари ва этномаданият бирлашмалари вакиллари иштирок этди.

Учрашувни Туркистон вилояти Қозоғистон халқи Ассамблеяси ҳузуридаги Журналистлар ва блогерлар клуби раиси Ерсултан Амирбек олиб борди. Тадбирни вилоят Ижтимоий тараққиёт бошқармаси раҳбарининг вазифасини бажарувчи Нурсултан Сейтжанов очиб, ёшларни бирлик, фаоллик ва билимга интилишга чақирди.

Тадбирда тиббиёт соҳаси фахрийси Шўра Исмўлдаев, тажрибали журналист Бейсенкул Наримбетова, дзюдодан Осиё чемпиони Дидар Хамза, тадбиркор хотин-қизлар уюшмаси раиси Дилноза Ўмарова ҳамда ошиқ отиш бўйича Осиё ва Жаҳон кубоги совриндори Алмас Қарабаев ўз тажрибалари билан ўртоқлашишди.

Меҳмонлар меҳнатсеварлик, қатъият, миллий қадриятлар ва замонавий имкониятлар ҳақида самимий ва ибратли фикрларини илгари суришди.

Учрашув якунида ёшлар саволлар бериб, фикр алмашишди. Машҳур шахслар маҳорат сабоғи ўтказиб, эсдалик учун суратга тушишди.