Давлат раҳбари Қасим-Жўмарт Тўқаев Миллий қурултойда ҳуқуқ-тартибот идоралари раҳбарларига “Қонун ва интизом” тамойилини амалга оширишни топширган эди. Ушбу топшириқ ижросини таъминлаш мақсадида Туркистон вилоят ички ишлар бошқармаси ва вилоят прокуратураси ташаббуси билан “Киберфирибгарлик: олдини олиш, ҳимояланиш, масъулият” мавзуида 1000дан зиёд киши иштирокида кенг кўламли республика анжумани ўтди.

Иштирокчилар эътиборига илк бор замонавий ахборот технологиялари ускуналари ва робототехника кўргазмаси тақдим этилди. Шунингдек, театрлаштирилган саҳна асарида энг кўп учрайдиган фирибгарлик турлари намойиш этилди. 

 Тадбирда вилоят ҳокимининг биринчи ўринбосари Зулпихар Жўлдасов, ИИБ бошлиғи Мурат Қабденов, вилоят прокурори Мурат Тлеубердиевлар иштирок этиб, минтақада фирибгарликнинг олдини олиш борасида амалга оширилаётган ишларга атрофлича тўхталишди.

Шунингдек, Қозоғистон Республикаси ИИВ Кибержиноятчиликка қарши кураш бошқармаси бошлиғи Жандўс Суюнбай, Туркистон вилояти иқтисодий тергов бошқармаси бошлиғи Ербўлат Балғабаев ва бошқалар киберфирибгарликнинг олдини олиш усул ва услублари ҳақида маълумот беришди. Очиқ мулоқот ташкил этилиб, унда вилоят ҳокимлиги, ҳуқуқ-тартибот идоралари мутасаддилари, жамоатчилик вакиллари, банк ходимлари, кредит ташкилотлари раҳбарлари иштирок этди.

Статистика маълумотларига кўра, вилоят ИИБ ҳузурида ташкил этилган Киберпол бошқармаси ходимлари томонидан “Интернетдаги фирибгарлик” ҳолатлари бўйича 113та жиноят иши судга юборилган. Уч нафар жиноий гуруҳ қўлга олиниб, уларнинг 38та жиноятга алоқадорлиги аниқланди. Жабрланганларга 269 миллион тенге қайтарилди. Шунингдек, 200дан ортиқ жиноят содир этишда гумон қилинган 13 нафардан иборат уюшган жиноий гуруҳ қўлга олинди, тергов ҳаракатлари олиб борилмоқда.

Полиция департаменти ва Халқаро Қозоқ-Турк университети ўртасида тузилган меморандум доирасида полиция ходимлари талабалар билан биргаликда киберкузатув тизими орқали ноқонуний мазмундаги 2 мингта материални мусоҳара қилди.

Бу чора-тадбирларнинг барчаси аҳолининг молиявий саводхонлигини ошириш, фирибгарликнинг олдини олиш мақсадида амалга оширилмоқда. Мазкур тадбир вилоятнинг 17 туманида давом этади.