Туркистон вилояти иқтисодиётини ранг-баранглаштириш мақсадида қайта ишлаш саноатига алоҳида аҳамият қаратилмоқда.

Вилоят ҳокими Нуралхан Кўшеров ташаббуси билан сармоядорлар билан учрашувлар ўтказилиб, минтақада бизнес юритиш имкониятлари ва афзалликлари тўғрисида маълумот берилди. Хусусан, маиший ва маъмурий жиҳозлар ишлаб чиқариш соҳасида йирик лойиҳаларни амалга ошириш режалаштирилган. 

Лойиҳадаги корхона йилига 60 минг тоннадан зиёд маҳсулот ишлаб чиқариш қувватига эга бўлиб, маҳаллий аҳолини доимий иш ўрни билан таъминлайди.

Ҳозирда бозорда мазкур маҳсулот турларининг импорт улуши 80 фоиздан юқори. Шу боис, қайта ишлаш саноатига сармоя жалб этилиши маҳаллий маҳсулот улушини сезиларли даражада ошириш имконини беради. Жумладан, қоғоз ишлаб чиқариш соҳасида хомашёдан тайёр маҳсулотгача бўлган барча босқичларни ўз ичига олган ишлаб чиқариш йўлга қўйилиши кўзда тутилган

Шунингдек, сармоядорлар қурилиш материаллари, қишлоқ хўжалиги жиҳозлари ҳамда саноат асбоб-ускуналари ишлаб чиқаришга ҳам қизиқиш билдирмоқда. Бу эса минтақада саноат кластерларини кенгайтириш, янги иш ўринларини барпо этиш ва маҳсулот сифатини ошириш имкониятини яратади.

Учрашувда Н. Қўшеров Туркистон вилояти сармоя учун қулай минтақа эканини таъкидлади. Вилоят орқали ўтадиган «Ғарбий Хитой – Ғарбий Европа» халқаро транспорт даҳлизи минтақанинг жаҳон бозорлари билан алоқаларини кучайтириши қайд этилди. Шу билан бирга, ҳокимлик сармоядорларга солиқ имтиёзлари, экспорт ва логистикада кўмак кўрсатиш, ишлаб чиқариш бинолари билан таъминлаш каби қатор имкониятларни таклиф этмоқда.