Вилоятимизда индустриявий-инновацион тараққиёт йўналишига устувор аҳамият қаратилмоқда. Минтақада янги корхоналарни барпо этиш, хомашёни чуқур қайта ишлаш ҳамда янги иш ўринларини яратишга қаратилган лойиҳалар босқичма-босқич амалга оширилмоқда.

Вилоят ҳокими Нуралхан Кўшеров раислигида ўтган навбатдаги Сармоявий штаб мажлисида янги заводлар қурилиши ва салоҳиятли лойиҳалар кенг муҳокама қилинди.

Йиғилишда вилоят ҳокими ўринбосарлари, бошқарма раҳбарлари, туман ва шаҳар ҳокимлари, шунингдек, маҳаллий ва хорижий сармоядорлар ҳамда тадбиркорлар иштирок этди. Кун тартибида сармоя жалб қилиш, сармоявий муҳитни яхшилаш ҳамда лойиҳаларни ўз вақтида ва сифатли амалга ошириш масалалари кўрилди.

Вилоят ҳокими ҳар бир сармоядорлар билан шахсан суҳбатлашиб, сармоя жалб қилиш, махсус иқтисодий минтақаларнинг салоҳиятидан самарали фойдаланиш юзасидан аниқ топшириқлар берди. Сармоявий штаб мажлисида жорий йил амалга ошириладиган муҳим лойиҳалар кўриб чиқилди. Жумладан, Саврон туманида арматура ишлаб чиқариш лойиҳаси амалга оширилмоқда. Сўзоқ туманида янги саноат майдони ҳамда «Инкай» конида янги заводнинг қурилиши амалга оширилмоқда. Корхона мутахассислари лойиҳаларнинг хусусиятлари ва ишлаб чиқариш кўрсаткичлари ҳақида маълумот беришди. Арис шаҳрида ўсимлик мойи заводи, Мақтаарал туманида профлистлар, қувурлар ва бошқа ускуналар заводи, Сариоғоч туманида ғишт цехи, Жетисай туманида пластик қутилар ишлаб чиқариш лойиҳаси ҳамда иссиқхона мажмуаси қурилишлари давом этмоқда. Ушбу лойиҳалар агросаноат соҳасини ривожлантириш ва экспорт салоҳиятини ошириш имконини беради.

Вилоятда амалга оширилаётган ушбу лойиҳалар – иқтисодиётни ранг-баранглаштириш, теран қайта ишлашни ривожлантириш, янги иш ўринларини яратиш ҳамда минтақанинг сармоявий жозибадорлигини ошириш йўналишидаги муҳим қадамдир. Саноат, қурилиш материаллари, металлни қайта ишлаш, агросаноат ҳамда озиқ-овқат саноатидаги янги лойиҳалар вилоятни мамлакатимизнинг етакчи саноат марказларидан бирига айлантириши кутилмоқда.