Вилоятимизда енгил саноат ва тўқимачилик тармоғини ривожлантириш борасида истиқболли лойиҳалар амалга оширилмоқда. Пахта кластерини ривожлантириш орқали иқтисодий юксалишга эришиш минтақа тараққиётининг стратегик йўналишига айланди.

Вилоят ҳокими Нуралхан Кўшеров жаҳон тўқимачилик саноатида етакчи ҳисобланган “Texhong Group” раҳбарлари билан учрашиб, қатор масалаларни муҳокама қилди. Томонлар йилига 300 минг тонна пахтани қайта ишлайдиган бир қанча завод қуриш режасини белгилашди.

– Туркистонда пахтани чуқур қайта ишлаш орқали саноатни янги босқичга олиб чиқиш устувор мақсадимиз. Минтақада инфратузилма билан таъминланган индустриал ҳудудлар мавжуд, сармоядорлар давлат томонидан қўллаб-қувватланади, – деди Нуралхан Кўшеров.

“Texhong Group” – Хитой, Вьетнам, Туркия, Мексика ва Никарагуада йилига 900 минг тонна пахтани қайта ишлайдиган корхоналарга эга. Компания Туркистонда ишлаб чиқариш баробарида замонавий технологияларни жорий этиш, экологик андазаларни татбиқ этиш ва касбий тайёргарлик тизимини ривожлантиришни ҳам кўзламоқда.

Бугунги кунда вилоятда 150 минг гектар майдонда пахта етиштирилмоқда. 25та пахтани қайта ишлаш корхонаси фаолият юритмоқда. 2027 йилгача ҳудудда бешта тўқимачилик кластерини ишга тушириш режалаштирилган.

Ушбу компаниянинг Туркистонга кириб келиши – доимий иш ўринлари ва янги имкониятлар манбаидир. Бу қадам вилоят саноатини кластер асосида тараққий эттиришга янги суръат бағишлайди.