Туркистон шаҳрида “Мардлик ва бирлик – қонун ва интизом таянчлари” номли кенг кўламли тадбир доирасида “Тоза Қозоғистон” хиёбони очилди. Ушбу ташаббус ҚР Молия мoниторинг агентлиги, вилоят Иқтисодий тадқиқотлар департаменти ва вилоят ҳокимлиги кўмагида амалга оширилди. Хиёбоннинг очилиш маросимида зиёлилар, ҳуқуқ-тартибот идоралари раҳбарлари, депутатлар ва жамоат арбоблари, фаол ёшлар иштирок этди.

Ушбу тадбир 1 Май – Қозоғистон халқи бирдамлиги куни ва Буюк Ғалабанинг 81 йиллигига бағишланди. 

Йиғилишда ҚР Президентининг маслаҳатчиси Maлик Ўтарбаев  ушбу ташаббуснинг маънавий ва ижтимоий аҳамиятига тўхталди. У хиёбон нафақат ободонлаштириш тадбири, балки ўтмишга ҳурмат ва келажакка эътибор эканлигини таъкидлаб, қонун устуворлиги ва интизом адолатли жамиятнинг асосий устуни эканлигини таъкидлади. Сўнгра эл-юрт равнақига муносиб ҳисса қўшган бир гуруҳ фуқароларни тақдирлади. 

Вилоят ҳокими Н. Кўшеров “Тоза Қозоғистон” дастури ҳаётий шиорга айланиши зарурлигига урғу берди. 

 Вилоят иқтисодий тадқиқотлар департаменти раҳбари Ербўлат Балғабаев ва фахрийлар кенгаши раиси Женисбек Мауленқулов ҳам сўзга чиқиб, бундай ташаббусларнинг ҳуқуқий маданиятни шакллантириш ва жамиятда адолатпарварлик тамойилларини мустаҳкамлашдаги аҳамиятини таъкидладилар.

Тадбирда ватанпарварлик  руҳидаги қўшиқлар ижро этилди. Арис шаҳридаги Т. Тажибаев номидаги “Болалар қишлоғи” тарбияланувчилари ва “Жаңа леп” жамоаси санъатини намойиш этди. 

Тадбир якунида хиёбонга таниқли қаҳрамонлар ва тарихий шахслар туғилган жойлардан етказилган кўчатлар ўтқазилди. Ҳар бир дарахтга рамзий маънода уларнинг номлари берилди.