Ҳужжат Президент топшириғига мувофиқ, Болалар ҳуқуқлари бўйича вакил ҳамда тегишли вазирликлар билан ҳамкорликда ишлаб чиқилган бўлиб, болалар ҳуқуқларини ҳимоя қилиш соҳасидаги чора-тадбирлар самарадорлигини оширишга қаратилган.

Концепция тўрт асосий йўналишни қамраб олади: болалар хавфсизлиги, таълим, соғликни сақлаш, оила ва ижтимоий ҳимоя. Уни амалга ошириш учун 158та чора-тадбир белгиланган, самарадорлик 10та кўрсаткич орқали баҳоланади. Умумий молиялаштириш ҳажми 1,3 триллион тенгени ташкил этади.

Ҳужжат доирасида мактабларда руҳшунос соати жорий этиш, болаларни “Адолатпарвар фуқаро” ғояси асосида тарбиялаш, зўравонликдан жабр кўрган болалар учун ёрдам хоналарини очиш, ягона рақамли руҳий ташхис дастурини яратиш, шунингдек, AI технологиялари орқали видеокузатув тизимларида зўравонлик ҳолатларини аниқлаш назарда тутилган.

Бош вазир Ўлжас Бектенов Қозоғистонда 7 миллионга яқин бола истиқомат қилаётганини қайд этиб, улар учун яратиладиган шароит мамлакат келажагини белгилашини таъкидлади. 

Бош вазир таъкидлаганидек, ўтган йил 1 июлдан эътиборан болаларни оилага жойлаштиришнинг янги шакли – қабул қилувчи оила тизими жорий этилди. Унинг доирасида ҳар бир бола учун 10 ОҲК миқдорида нафақа, ҳар бир тарбиячига эса 70 ОҲК миқдорида хизмат ҳақи тўланиши назарда тутилган. Бу мақсадлар учун давлат бюджети ҳисобидан тегишли маблағ ажратилган.

Шу муносабат билан вилоят ҳокимларига қабул қилувчи оилаларни ташкил этиш ва мазкур йўналишдаги ишларни жадаллаштириш юзасидан аниқ топшириқлар берилди.

Умумий мувофиқлаштириш Бош вазир ўринбосари – маданият ва ахборот вазири Аида Балаевага юклатилди.