Туркистон шаҳридаги 32-сонли умумий ўрта мактабда жамоа ташаббуси билан «Ягона ниҳол – ягона ҳаёт» мавзуида экологик акция ўтди. У Давлат раҳбари ташаббуси билан амалга оширилаётган «Тоза Қозоғистон» дастури доирасида ташкил этилди.

Акциядан кўзланган мақсад – мактаб ҳовлисини кўкаламзорлаштириш ва ёш авлодда табиатга меҳр-муҳаббат туйғусини шакллантиришдан иборат. 

Тадбирда ота-оналар фаол иштирок этиб, ўзлари келтирган ниҳолларни фарзандлари билан биргаликда ўтқазишди. Бу эзгу ташаббус оилавий қадриятларни мустаҳкамлаш билан бирга, болаларга экологик тарбия беришнинг ёрқин намунасига айланди. Мактаб ўқитувчилари ҳам ушбу ташаббусни қўллаб-қувватлаб, кўкаламзорлаштириш ишларида фаол иштирок этдилар.

Тадбир давомида ўқувчилар концерт дастурини намойиш этишди. 

Ушбу кенг қамровли тадбирда Туркистон вилояти ҳокими ўринбосари Ертай Алтаев ҳамда Туркистон шаҳри ҳокими Азимбек Пазилбекули иштирок этиб, акциянинг аҳамиятига тўхталдилар. Улар ўз нутқларида атроф-муҳитни муҳофаза қилиш ҳар бир фуқаронинг умумий бурчи эканлигини таъкидлаб, бундай эзгу ташаббуслар жамият учун улкан аҳамият касб этишини алоҳида қайд этдилар.