Давлат раҳбари Қасим-Жўмарт Тўқаев мамлакатимизга амалий ташриф билан келган Россия Федерацияси Бош вазири Михаил Мишустинни қабул қилди.

Учрашув чоғида Қозоғистон ва Россия ўртасидаги стратегик ҳамкорлик ҳамда иттифоқчилик муносабатлари мустаҳкамланаётгани алоҳида таъкидланди. Шунингдек, ўзаро манфаатли мулоқотни изчил давом эттириш ва олий  даражада эришилган келишувларни амалга ошириш жараёни жадал кечаётганига эътибор қаратилди.

Давлат раҳбари таъкидлаганидек, Михаил Мишустиннинг Шимкент шаҳрида ўтган Евроосиё ҳукуматлараро кенгаши йиғилиши ҳамда Рақамли анжуманда иштирок этиши Қозоғистон ва Россия ўртасидаги муносабатларнинг янги босқичга кўтарилганини  яна бир бор тасдиқлайди.

– Икки томонлама иқтисодий ҳамкорлик изчил ривожланмоқда. Ҳозирги кунга қадар умумий қиймати 25 миллиард доллар бўлган 122та йирик лойиҳа амалга оширилди. Ўзаро савдо ҳажми эса 30 миллиард долларга яқинлашди. Бу, албатта, яхши кўрсаткич. Россия бизнинг асосий савдо-иқтисодий ва сармоявий ҳамкоримиз ҳисобланади. Биз бундай ҳамкорликдан мамнунмиз, – деди Қ. Тўқаев.

Мулоқот  давомида Россия Федерацияси Президенти Владимир Путиннинг Қозоғистонга бўлажак давлат ташрифига тайёргарлик масалалари ҳам муҳокама қилинди.

Давлат раҳбари таъкидлаганидек, Астана мазкур ташрифни икки мамлакат ўртасидаги стратегик ҳамкорлик ва иттифоқчилик муносабатларини янада мустаҳкамлашга хизмат қиладиган муҳим воқеа сифатида баҳоламоқда.