Сайрам тумани марказидаги Қ. Жандарбеков номли Маданият уйида «Таълим истиқболи: адолатли фуқаро, касбий мутахассис» мавзуида устоз-мураббийларнинг август анжумани ўтди. 

Унда туман ҳокимлиги, вилоят идоралари вакиллари, фахрий устозлар, мактаб директорлари ва ўқитувчилар иштирок этишди.

Тадбирда 2024-2025 ўқув йилининг якунлари чиқарилиб, янги ўқув йили учун устувор йўналишлар белгиланди. 

Жумладан, анжуманда сўз олган Сайрам тумани ҳокими вазифасини вақтинча бажарувчи С. Дуйсебаев, вилоят иқтидорли болаларни аниқлаш ва қўллаб-қувватлаш маркази директори вазифасини вақтинча бажарувчи К. Нуржанова, туман прокурори Б. Байғўзиев, туман маслаҳати раиси Ш. Холмуродов, туман таълим бўлими раҳбари Б. Ахметов, фахрий устозлар, мактаб директорлари замонавий таълим масалаларига оид фикр-мулоҳазаларини билдиришди.

Бугунги кунда туманда 80 мингдан ортиқ ўқувчини қамраб олган 204та таълим муассасаси фаолият юритмоқда. Ушбу масканларда 10 мингга яқин ўқитувчи меҳнат қилмоқда.

Янги 2025-2026 ўқув йилида мактабларда «Адолатли фуқаро» миллий тарбия дастури жорий этилади. «Келажак мактаблари» миллий лойиҳаси доирасида янги мактаблар ишга туширилади, шунингдек, ўқитувчиларнинг касбий ривожланиши ва рақамли саводхонлигини ошириш тадбирлари давом эттирилади. Анжуманда адолатпарварлик ва тадбиркорлик, сунъий идрокнинг ўрни, барчага тенг таълим, рақамлаштириш ҳамда ишчи касбларнинг аҳамияти муҳокама қилинди.