Туркистон спортчилари янги зафарларга эришмоқда. Жорий йилнинг 9 ойи мобайнида вилоят спортчилари мамлакат чемпионатларида 1060та, Осиё миқёсидаги мусобақаларда 109та, жаҳон чемпионатларида эса 79та медални қўлга киритди.

Бекзат Саттарханов номидаги спорт мажмуасида ўтган тантанали маросимда шу каби ютуқларга эришган бир гуруҳ спортчиларни Туркистон вилояти ҳокими Нуралхан Кўшеров самимий табриклади ва эсдалик совғаларини топширди.

– Сизларни эркин кураш ва армрестлинг бўйича жаҳон чемпионатидаги тарихий ғалабангиз билан чин дилдан табриклайман! Бу ютуқлар меҳнат, сабр ва ироданинг натижасидир. Туркистон ёшларининг дунё саҳнасида мамлакат байроғини сарбаланд этгани  биз учун юксак ифтихор, – деди ҳоким.

Мамлакат раҳбари Қасим-Жўмарт Тўқаев спорт соҳасини ривожлантиришга алоҳида эътибор қаратмоқда. Туркистон вилоятида ҳам замонавий спорт иншоотлари барпо этилмоқда, ёш истеъдодлар қўллаб-қувватланмоқда.

Шу маросимда Хорватияда ўтган жаҳон чемпионатида бронза медалини қўлга киритган Асилжан Есенгелдига янги автомашина калити топширилди. Шунингдек, армрестлинг бўйича бир неча бор жаҳон чемпиони бўлган Санжар Зарубек, Нурдаулет Айдархан ва Ердаулет Мухаммедов ҳам янги “темир тулпар”лар соҳиби бўлдилар.

Армрестлинг жамоасига эса 10 миллион тенге миқдоридаги сертификат тақдим этилди. Тадбирда  24 нафар спортчи ва мураббийларга фахрий ёрлиқлар топширилди.

Ҳозир вилоятда эркин, юнон-рум ва хотин-қизлар кураши йўналишларида 5500 нафардан зиёд спортчи мунтазам шуғулланмоқда. Уларни 260 нафар мураббий мусобақаларга тайёрламоқда.

Бу натижалар Туркистон спортининг юксак салоҳияти, ёшларнинг матонати ва Ватанга садоқати намунасидир.