Байрам куни Туркистон шаҳрида 512 оилага янги квартиралар калитлари топширилди. Шу тариқа уч мингдан зиёд фуқаро янги хонадон соҳибига айланди.

Уй-жойга муҳтожлар рўйхатида турган фуқароларнинг қувончига шерик бўлиш мақсадида ташкил этилган тадбирда Туркистон вилояти ҳокими Нуралхан Кўшеров иштирок этиб, янги уй эгаларига хонадон калитларини топширди.

– Барчангизни узоқ кутилган ва қувончли воқеа — янги уй билан самимий табриклайман. Дарҳақиқат, уй-жой ҳар бир оиланинг фаровонлиги, хотиржамлиги ва бахтли ҳаётининг асосидир. Давлат раҳбари томонидан аҳоли фаровонлигини ошириш ва фуқароларни уй-жой билан таъминлаш устувор вазифа сифатида белгилаб қўйилган. Бу борадаги топшириқлар изчил амалга оширилаётгани натижасида минглаб оилаларнинг уй-жой масаласи ҳал этилмоқда, – деди вилоят ҳокими.

Қайд этилганидек, ўтган йили вилоят бўйича уй-жой навбатида турган 3564 оила квартира билан таъминланган бўлса, жорий йилда яна 2292 оилани уй-жой билан таъминлаш режалаштирилган. Байрам муносабати билан эса яна 512 оила бошпанали бўлди.

Вилоят раҳбари янги уй соҳибларини ҳовли ва атроф-муҳитни ободонлаштириш ва кўкаламзорлаштириш ишларида фаол иштирок этишга чақирди. Таъкидланганидек, бугун қурилаётган қулай ва замонавий уй-жойлар келажак авлод тарбия топадиган маскан ҳисобланади.

Маълум қилинишича, янги уйлар ижтимоий ҳимояга муҳтож аҳоли қатламлари ва кўп фарзандли оилаларга ажратилган.

Шунингдек, 2025 йил 24 майдан кучга кирган уй-жой қонунчилигидаги ўзгартиришларга мувофиқ, уй-жойга муҳтож фуқароларни ҳисобга олиш, навбатни юритиш ҳамда уй-жой тақсимоти вазифалари «Отбасы банк» ҳиссадорлик жамиятига ўтказилган.