Вилоят ҳокимлигида ўтган девон йиғилишида бандликни таъминлаш, меҳнат муносабатларини қонунийлаштириш ва ёшларни ишга жалб этиш юзасидан аниқ вазифалар белгиланди.

Вилоят ҳокими Нуралхан Кўшеров соҳадаги мавжуд муаммо ва камчиликларни муҳокама қилиб, масъул бошқармалар ҳамда шаҳар ва туман ҳокимларига ишларни янада жадаллаштириш юзасидан топшириқлар берди.

Йиғилишда қайд этилганидек, минтақада янги ишлаб чиқариш корхоналари ва заводлар фаолият бошламоқда. Шу муносабат билан маҳаллий аҳолини мазкур корхоналарга ишга жойлаштириш муҳим вазифалардан бири сифатида белгиланди.

– Янги очилаётган завод ва корхоналарда маҳаллий аҳоли бандлигини таъминлаш зарур. Бу жараённи масъул бошқармалар, шаҳар ва туман ҳокимликлари ҳамда «Мавқе» марказлари ўзаро ҳамкорликда мувофиқлаштириши керак. Фуқаролар учун корхоналарга танишув ташрифлари ташкил этиш, уларни бўш иш ўринлари ҳақида хабардор қилиш ва ишга жойлашишларига кўмаклашиш лозим. Мавжуд имкониятлардан самарали фойдаланиш талаб этилади, – деди Нуралхан Кўшеров.

Шу билан бирга, пенсия ажратмаларининг ўз вақтида ўтказилиши, электрон меҳнат шартномаларини расмийлаштириш ва ходимларни бахтсиз ҳодисалардан мажбурий суғурталаш талабларига риоя этилишини таъминлаш юзасидан аниқ топшириқлар берилди.

Вилоят бандликни мувофиқлаштириш ва ижтимоий дастурлар бошқармаси раҳбари Мекенхан Қўзиханулининг маълум қилишича, меҳнат муносабатларини қонунийлаштириш, ижтимоий тўловлар барқарорлигини таъминлаш ва ёшларни фаол бандлик чора-тадбирларига жалб этиш юзасидан тизимли ишлар олиб борилмоқда.

Йиғилиш якунида аҳоли бандлигини таъминлашга қаратилган чора-тадбирлар самарадорлигини ошириш, электрон меҳнат шартномаларини расмийлаштириш, мажбурий пенсия бадаллари ва суғурта шартномаларининг қонун талабларига мувофиқ амалга оширилишини таъминлаш, шунингдек, NEET тоифасидаги ёшларни бандлик дастурларига кенг жалб этиш юзасидан масъулларга аниқ вазифалар юклатилди.