Туркистон шаҳридаги 5574-ҳарбий қисмда Ватан ҳимоячилари куни арафасида ҳарбий ватанпарварлик мавзуида концерт ташкил этилди. Тантанали тадбирда вилоят полиция департаменти, мудофаа ишлари бўйича департамент, Фавқулодда вазиятлар департаменти вакиллари, ҳудудий мудофаа бригадаси, Миллий гвардия қўшинлари, фахрийлар ҳамда ёш аскарлар иштирок этишди.

Вилоят ҳокими Нуралхан Кўшеров йиғилганларни байрам билан табриклади:

– Қадрли фахрийлар! Шижоатли саркарда ва зобитлар! Сизларни 7-май – Ватан ҳимоячилари куни билан чин қалбимдан муборакбод этаман! Она Ватанни ҳимоя қилиш – ҳар бир фуқаронинг муқаддас бурчидир. Қаҳрамон аждодларимиз юрт озодлиги йўлида жонини фидо қилиб, мустақилликни бизга омонат қилди. Ана шу омонатга садоқатли бўлиш бугунги авлоднинг муқаддас вазифасидир.

Давлат раҳбари Қ. Тўқаев таъкидлаганидек: “Мамлакат хавфсизлиги ва чегараларини ҳушёрлик билан қўриқлаш, қонун ва интизом устуворлигини таъминлаш – ўта масъулиятли ва шарафли вазифадир. Буни фақат юксак касбий маҳоратга эга, қасамёд ва бурчига содиқ, Ватан учун жон куйдирадиган жасур инсонларгина адо эта олади”. Шу боис ёшлар қалбида ватанпарварлик руҳини шакллантириш бугунги куннинг долзарб вазифаларидир. Вилоятда мазкур йўналишда тизимли ишлар амалга оширилмоқда,– деди минтақа раҳбари.

Тадбир якунида Н. Кўшеров мамлакат хавфсизлигини таъминлаш йўлидаги намунали хизмати учун бир гуруҳ ҳарбий хизматчиларни тақдирлади.

Тадбир байрам концертига уланиб кетди, ватанпарварлик мавзуидаги куй-қўшиқлар янгради.