Туркистон шаҳридаги “Карвон-сарой” сайёҳлик мажмуасида 1 Май – Қозоғистон халқи бирдамлиги куни нишонланди. Тадбирда вилоят ҳокими Нуралхан Қўшеров иштирок этиб, аҳоли ва меҳмонларни байрам билан табриклади.

Ҳоким ўз нутқида бирлик ва ҳамжиҳатлик мамлакат барқарорлиги ва тараққиётининг асосий омили эканини таъкидлади. Шунингдек, Қасим-Жўмарт Тўқаевнинг “Халқнинг бир-бирига меҳр-оқибати туфайли оғир дамларда ҳам миллатнинг яхлитлигини намоён эта олдик”, деган фикрларини келтирди.

Ҳокимнинг маълум қилишича, Туркистон вилоятида 2 миллион 200 мингдан зиёд аҳоли истиқомат қилади ва 50дан зиёд этнос вакиллари тинч-тотувликда умргузаронлик қилишмоқда. Шунингдек, ҳудудда 11та этномаданият бирлашмалари фаолият юритмоқда.

– Яқин кунларда Туркистон шаҳрида туркий давлатлар Президентларининг муҳим учрашуви ўтказилиши режалаштирилмоқда. Бу тадбир вилоят тараққиётига алоҳида жўшқинлик беради, – деди минтақа раҳбари.

Тадбир давомида минтақа тараққиётига ҳисса қўшган этномаданият бирлашмалари вакилларига мукофотлар топширилди.

“Жаңа леп”, “Фараб” дастаси, “Семсер” гуруҳи ҳамда  таниқли хонандалар ижросида концерт дастури намойиш этилди.