Туркистон вилоятида аҳоли турмуш сифатини оширишга қаратилган тизимли ишлар изчил давом этмоқда. Оқсувкент қишлоғидаги марказий истироҳат боғида кенг кўламли бунёдкорлик ишлари амалга оширилиб, сўлим гўшанинг қиёфаси тубдан ўзгарди. Замонавий кўнгилочар-ҳордиқ маскани Қозоғистон халқи бирдамлиги кунига бағишланган тадбирлар доирасида фойдаланишга топширилди.

Истироҳат боғида аҳоли ва меҳмонларнинг мазмунли ҳордиқ чиқаришлари учун барча шароитлар яратилган. Унинг марказий қисмида фаввора, 20га яқин аттракционлар ўрнатилган, атрофи кўкаламзорлаштирилган. Лойиҳа хусусий сармоядорлар томонидан амалга оширилиб, умумий сармоя ҳажми тахминан 675 миллион тенгени ташкил этди.

Тантанали тадбир доирасида вилоят ҳокими Нуралхан Кўшеров турли миллат вакиллари иштирокида ташкил этилган кўргазмани кўздан кечириб, аҳолини Қозоғистон халқи бирдамлиги куни билан табриклади. У ўз нутқида Президент белгилаган вазифалар асосида вилоятда миллатлараро тотувликни мустаҳкамлаш юзасидан тизимли ишлар амалга оширилаётганини қайд этди.

Бугун Сайрам туманида 243 мингдан зиёд аҳоли истиқомат қилади. 39 миллат вакиллари ягона чанғароқ остида тинч-тотув ҳаёт кечирмоқда. Бу эса мамлакатдаги ижтимоий барқарорлик ва бирдамликнинг ёрқин намунасидир.

Яшил ҳудуд, замонавий меъморчилик, қулай инфратузилмаси билан ажралиб турадиган бу боғ аҳоли ҳордиғи, авлодлар учрашуви, оилавий дам олиши учун қулай бўлган ҳақиқий маданият ва истироҳат масканига айланади.