Учрашувда икки давлат ўртасидаги стратегик ҳамкорлик ва иттифоқчилик муносабатларини янада мустаҳкамлаш масалалари муҳокама қилинди.

Давлат раҳбари Қозоғистон – Россия муносабатлари изчил ривожланиб бораётганини таъкидлаб, олий даражада эришилган келишувларни амалий жиҳатдан тўлиқ рўёбга чиқариш муҳимлигини қайд этди. Шунингдек, савдо-иқтисодий, сармоявий ҳамда маданий-гуманитар алоқаларни кенгайтириш икки томон учун устувор вазифалардан экани қайд этилди.

Мулоқот чоғида жорий йил май ойи охирига режалаштирилган Владимир Путиннинг Қозоғистонга давлат ташрифига тайёргарлик тадбирларига алоҳида эътибор қаратилди.

Қасим-Жўмарт Тўқаев мазкур ташриф икки томонлама муносабатлар кун тартибидаги энг муҳим сиёсий воқеалардан бири сифатида баҳоланаётганини таъкидлади.

– Биз ушбу ташрифни жорий йилги икки томонлама ҳамкорликнинг асосий тадбири деб ҳисоблаймиз. У мамлакатларимиз ўртасидаги иттифоқчилик муносабатларини янада чуқурлаштиришда муҳим босқич бўлади, – деди Президент.

Ўз навбатида, Сергей Лавров ташрифга тайёргарлик жараёнлари ҳақида ахборот бериб, Қозоғистон ва Россия ўртасидаги кўп қиррали ҳамкорликка доир асосий масалалар икки мамлакат ҳукуматлари ҳамда ташқи сиёсат идоралари даражасида атрофлича ишлаб чиқилаётганини маълум қилди.

Учрашув якунида томонлар минтақавий ва халқаро кун тартибидаги долзарб масалалар юзасидан ҳам фикр алмашдилар.