Инсоннинг ҳаётидаги энг муҳим жиҳат унинг касб танлашидир.

Аксар кишилар ўзи хоҳламаган ишни, яъни қобилияти етмаган касб бошини тутишга мажбур бўладилар. Ота-оналар амалга ошмаган орзуларига фарзанди орқали эришишни истайди. Ўн бир йил ўқиган синфдош дўстидан ё дугонасидан ажралишни истамай у танлаган ўқишга бирга бориши, бир касбнинг сердаромадлигини кўриб, шу томонига қизиқиб, қобилияти етмасада танлаши ва яна шу каби бошқа сабаблар муваффақиятсизликка сабаб бўлади. Олимларнинг аниқлашларича, ўзи хуш кўрмаган иш билан шуғулланувчи инсонларда қон босимининг ошиши, қанд касаллигига чалиниш эҳтимоли юқори бўлар экан.

Ўткир Ҳошимов “Дафтар ҳошиясидаги битиклар” китобида “Ҳар ким ўз юмушини бажарса, олам – гулистон. Сартарошни сувоқчи қилиб қўйсангиз, деворга совун кўпигини суртади. Этикдўзни сартарош қилсангиз, одамнинг бошига мих қоқади...”, дейди. Буюк аллома Абу Наср ал Форобий ҳам ўзининг “Фозил инсонлар шаҳри” асарида “Кимдир илмга мойил, кимдир ҳунарга, кимдир бошқаришга, кимдир хизмат қилишга. Шунинг учун ҳар ким ўз қобилиятига мос ишни бажарса, жамият ривожланади”, деб ёзади.

Ҳурматли ота-оналар! Фарзандингиз тўғри касб танлашида сиз етакчи аҳамиятга эгасиз. Аввало, касб фақат даромад манбаи эмас, балки инсоннинг бутун ҳаётига таъсир қилувчи танлов эканлигини унутманг. Фарзандингизни тингланг. Унинг қизиқиши, қобилияти ва орзуларини билишга ҳаракат қилинг. Фарзанднинг тўғри касб танлаши – ота-онанинг меҳри, ишончи ва тўғри маслаҳатига боғлиқ.

Келинг, болаларимизнинг келажаги учун масъул бўлайлик!