Вилоят ҳокимлигида ҚР Янги конституцияси лойиҳаси муҳокамасига бағишланган йиғилиш ўтди. Унда вилоят ҳокими Нуралхан Кўшеров, маслаҳат котиби Нурали Абишов, маслаҳат депутатлари, туман ҳокимлари, жамоат ташкилотлари вакиллари ҳамда фаол ёшлар иштирок этишди.

Йиғилишда сўзга чиққан Конституциявий комиссия аъзоси, вилоят маслаҳати раиси Нурали Абишов ушбу кенг кўламли ислоҳотлар юртимизнинг маданий ва маънавий тараққиётига янги суръат бағишлашига ишонч билдирди.

– Янги Конституция муқаддимасида Қозоғистоннинг ягона миллат экани, давлатнинг ҳудудий яхлитлигини сақлаш, “Адолатли Қозоғистон” ғояси ҳамда “Қонун ва тартибот” тамойиллари мустаҳкамланди. Шунингдек, табиатни муҳофаза қилиш, экологияни асраш, илм-фан ва таълимни, инновациялар, инсоннинг асосий ҳуқуқ ва эркинликларини ҳимоя қилиш, суд ҳокимиятининг мустақиллиги, никоҳ ва оила қадриятларига оид меъёрлар кучайтирилди, – деди у.

Йиғилишда, шунингдек, вилоят Адлия департаменти раҳбарининг ўринбосари Нурлан Ербекешов янги Конституция лойиҳасида халқнинг ўрни сезиларли даражада оширилганини таъкидлади. “AMANAT” партияси Туркистон вилояти филиали раиси, вилоят маслаҳати депутати Алтинсари Умбеталиев эса янги Конституция лойиҳасида Парламентнинг таъсирини кучайтириш, маҳаллий бошқарувни ривожлантириш ва фуқароларнинг ҳуқуқ ва эркинликларини ҳимоя қилишга алоҳида эътибор қаратилганини таъкидлади.

Шунингдек, вилоят фахрийлар кенгаши раиси Женисбек Мауленқулов Конституция лойиҳаси юзасидан ўз таклифларини илгари суриб, ташаббусни қўллаб-қувватлашини маълум қилди. 

Йиғилиш якунида вилоят ҳокими Нуралхан Кўшеров янги Конституция лойиҳаси республика референдуми орқали тасдиқланиши, конституциявий ислоҳотлар давлатнинг сиёсий, ҳуқуқий ва ижтимоий тараққиётига ижобий таъсир кўрсатишини таъкидлади.