Шимкент шаҳридаги "Сайрам" тиббиёт коллежида Қозоғистон Республикаси Парламенти Мажлиси депутати, «AMANAT» партияси фракцияси аъзоси Бўлатбек Нажметдинули билан учрашув ўтди. 

Халқ ноиби таълим муассасасининг моддий-техника базаси билан танишди, шунингдек, коллеж жамоаси билан очиқ ва мазмунли фикр алмашиб, бўлажак тиббиёт мутахассисларини тайёрлаш, таълим сифатини ошириш, ўқув-тарбиявий жараённи такомиллаштириш йўналишида олиб борилаётган ишлар билан яқиндан танишди.

Тадбирда «AMANAT» партиясининг Қаратау туман бўлими ижроия котиби Данияр Ўмаров, шаҳар маслаҳати депутати Лазиз Сулаймонов, Шимкент шаҳри ҚХА ҳузуридаги медиатор Аббос Шомирзаев, шаҳар таълим бошқармаси вакиллари, коллеж ўқитувчилари ҳамда талабалар иштирок этдилар.

Коллеж муассиси А. Баймағамбетов меҳмонни ўқув хоналари, замонавий лабораториялар ва ўқув-ишлаб чиқариш базалари билан таништириб, талабаларнинг сифатли таълим олиши ва касбий жиҳатдан шаклланиши учун яратилган шарт-шароитлар ҳақида маълумот берди. 

Депутат талабаларнинг таклиф ва фикрларини тинглаб, таълим соҳасини ривожлантиришга қаратилган ташаббуслар доим қўллаб-қувватланишини таъкидлади.