Саврон туманида Хитой Халқ Республикасининг Шинжон уйғур автономия туманига қарашли Сауан шаҳрининг расмий делегацияси билан учрашув ўтди. Мазкур ташрифдан кўзланган  асосий мақсад – минтақалараро  иқтисодий, маданий ва ижтимоий йўналишдаги ҳамкорликни мустаҳкамлаш, янги ташаббусларни муҳокама қилиш ва ўзаро манфаатли шериклик доирасини кенгайтиришдан иборат.

Учрашувда Саврон тумани ҳокими Мақсат Танғатаров сўз олиб,  икки ҳудуд ўртасидаги иқтисодий алоқаларни ривожлантиришга тайёр эканлигини маълум қилди.

Тадбирда қишлоқ хўжалиги, сайёҳлик, ишлаб чиқариш, инфратузилма ва ижтимоий лойиҳаларга доир таклифлар муҳокама қилинди. Томонлар ҳамкорликнинг келгусидаги  устувор йўналишларни белгилаб, тақдим этилган лойиҳаларни  кўриб чиқдилар. Йиғилиш якунида иштирокчилар икки томонлама муносабатларнинг янги босқичга кўтарилишига ишонч  билдириб, учрашувдан мамнунлигини изҳор этишди.

Делегация ёмғирлатиб ва томчилатиб суғориш тизимларини ишлаб чиқарадиган “BNK Group” бирлашмасининг ишлаб чиқариш цехларида бўлди. Мазкур корхона АҚШнинг  “Nelson Irrigation” компанияси билан ҳамкорлигида “BNK IRRIGATION” бренди остида ёмғирлатиб суғориш машиналарини ишлаб чиқармоқда. Ушбу  технология қишлоқ хўжалигида самарадорликни  ошириш имконини беради.

Шунингдек,  делегация аъзолари “Aqniet Holding” корхонасининг ишлаб чиқариш майдонида бўлди. Компания таълим муассасалари учун мўлжалланган жиҳозлар ишлаб чиқаради. Сўнгги уч йилда корхона 50га яқин мактабларни зарур жиҳозлар билан таъминлаган.

Делегация вакиллари корхоналарнинг ишлаб чиқариш имкониятларига қизиқиш билдириб, келгусида қўшма лойиҳаларни амалга ошириш юзасидан таклифларни муҳокама қилдилар.