Астана шаҳрида Қозоғистон ва Туркманистон раҳбарлари ўртасида кенгайтирилган музокаралар ўтди.

Учрашувда Сардор Бердимуҳамедов икки давлатни ўзаро тарихий илдизлар, маданий яқинлик ва анъаналар бирлаштиришини таъкидлади. Унинг айтишича, муносабатлар 2017 йилги Стратегик ҳамкорлик тўғрисидаги битим ҳамда 2024 йилги Дўстлик ва кўп қиррали стратегик ҳамкорликни мустаҳкамлаш декларацияси асосида изчил давом этмоқда.

Туркманистон раҳбари икки мамлакатнинг тинчлик ва хавфсизлик, энергетика барқарорлиги, транспорт-коммуникация йўналишлари, иқлим ўзгаришига қарши кураш каби соҳалардаги ҳамкорлигига юксак баҳо берди.

Президент Қасим-Жўмарт Тўқаев ҳамкорлик барча йўналишларда мустаҳкамланиб бораётганини қайд этар экан, Қозоғистон томони Туркманистон иқтисодиётига 150 миллион доллардан зиёд сармоя киритганини маълум қилди. Туркманистон капитали иштирокида эса Қозоғистонда 140га яқин компания фаолият юритмоқда.

Сўнгги беш йилда икки давлат ўртасидаги ўзаро савдо ҳажми тўрт бараварга ошиб, бугунги кунда ярим миллиард доллардан зиёдни ташкил этди. Транспорт, саноат, логистика, энергетика, айниқса, газ соҳасида қатор истиқболли лойиҳалар амалга оширилмоқда.

Давлат раҳбарлари ҳукуматларга бизнесни қўллаб-қувватлаш ва янги қўшма лойиҳаларни йўлга қўйиш юзасидан аниқ топшириқлар берди. Музокаралар натижалари икки мамлакат ўртасидаги стратегик ҳамкорликни янги босқичга кўтариши кутилмоқда.

Тантанали маросим чоғида Қасим-Жўмарт Тўқаев Сардор Бердимуҳамедовни мамлакатнинг олий мукофоти – “Алтын Қыран” ордени билан тақдирлади.