Туркистон вилояти,  Сайрам туманига қарашли Қорамурт қишлоғида “Қишлоқ қутқарувчилари” дастури доирасида янги ихтиёрий ёнғин хавфсизлик шохобчаси ишга туширилди. Тантанали маросимда Қозоғистон Республикаси Фавқулодда вазиятлар вазири, генерал-лейтенант Шинғис Ахринов ҳамда Туркистон вилояти ҳокими Нуралхан Кўшеров иштирок этди.

Лойиҳани амалга оширишда маҳаллий тадбиркорлар ҳам фаол иштирок этиб, шохобча биноси қурилиши ва зарур жиҳозлар билан таъминланишига катта ҳисса қўшдилар.

– Тадбиркорлар томонидан бундай ташаббусларнинг қўллаб-қувватланаётгани қувонарли ҳол, –  деди вазир Ш. Ахринов. –  Бу қишлоқ аҳолисининг хавфсизлигини таъминлаб, маҳаллаларда ёнғин хавфсизлигини мустаҳкамлашга ҳам хизмат қилади.

Янги шохобча  фаолияти учун зарур барча зарур ускуналар,  шароитлар билан таъминланган: ўт ўчириш техникаси учун гараж, навбатчи хоналари, алоқа воситалари билан жиҳозланган диспетчерлик бўлими, ошхона, дам олиш жойи ва “Batyr Team” спорт зали мавжуд. Ихтиёрий қутқарувчилар Фавқулодда вазиятлар вазирлиги томонидан махсус кийим, радиостанция ва ўт ўчириш автоцистернаси билан таъминланди.

“Қишлоқ қутқарувчилари” шохобчалари Қорамурт, Низомобод ва Оққалъа қишлоқлари аҳолисига хизмат кўрсатади. Бу ҳудудларда 19 мингдан зиёд аҳоли истиқомат қилади. Янги тизим фуқароларнинг хавфсизлигини таъминлаш, фавқулодда ҳолатларга тезкор жавоб бериш имконини оширади.