Минтақа раҳбари Н. Кўшеров бошчилигидаги вилоят делегацияси Ўзбекистон Республикасига ташриф буюрди. 

Унинг таркибида туризм соҳасининг мутасадди бошқарма ва муассасалар раҳбарлари, сайёҳлик ташкилотлари раҳбарлари, меҳмонхоналар вакиллари ва соҳа мутахассислари бор. Мақсад – Туркистон вилояти ва Ўзбекистон Республикаси ўртасида туризмни ривожлантириш бўйича музокаралар юритиб, ўзаро ҳамкорлик ўрнатиб, тажриба алмашишдир. Дастлаб 

Н. Кўшеров Тошкент шаҳрида Ўзбекистон Транспорт вазири Илҳом Маҳкамов билан учрашиб, ҳамкорлик йўлларини муҳокама қилди. 

– Мамлакатларимизни умумий тарих, маънавий қадриятлар ва маданий мерос бирлаштиради. Туркистон вилояти туризм ва транспорт инфратузилмасининг равнақини Қозоғистон ва Ўзбекистон ўртасидаги ҳамкорликнинг муҳим йўналиши сифатида белгилаган. Минтақамизнинг сайёҳлик салоҳияти юксак: табиий бойликлари, тарихий обидалари, маънавият марказлари ва сайёҳлик масканлари Ўзбекистон ва бошқа мамлакатлардан келган меҳмонларни қизиқтиради. Вилоятнинг асосий қадамжоларидан бири – ЮНЕСКОнинг Бутунжаҳон мерослар рўйхатига киритилган Хожа Aҳмад Яссавий мақбарасидир. Бундан ташқари, вилоятда 1780тадан зиёд тарихий ва маданий ёдгорликлар, шунингдек, тўртта махсус қўриқланадиган табиий ҳудудлар жойлашган. Туркистон шаҳрида йилига 3 миллиондан зиёд йўловчига хизмат кўрсатадиган халқаро аэропорт фаолият юритмоқда. Вилоят ҳокимлиги Туркистон ва Ўзбекистон шаҳарлари ўртасида янги рейсларнинг очилишини қўллаб-қувватлади. Шу жумладан, Туркистон – Урганч – Туркистон йўналишини йўлга қўйиш масаласи илгари сурилмоқда. Шунингдек, автотранспорт ва темирйўл қатновини яхшилаш, сайёҳлик йўналишларини ишлаб чиқиш ва сайёҳлар чегарадан қулай ўтишлари учун “яшил йўлаклар” ташкил этишдан манфаатдормиз, – деди Нуралхан Кўшеров.

Илҳом Маҳкамов Ўзбекистон Қозоғистоннинг ишончли ҳамкори эканлигини айтиб, таклифлар, албатта, инобатга олиниши ва қўшма лойиҳаларни йўлга қўйиш борасида ишлар фаоллашаётганини таъкидлади.