Kazinform. Тулкибош туманида йилига 48 минг тонна парранда гўшти етиштириш қувватига эга фабриканинг қурилиши бошланди. Лойиҳанинг тамал тошини қўйиш маросимида вилоят ҳокими Нуралхан Кўшеров иштирок этиб, янги корхона минтақанинг иқтисодиётига жўшқинлик беришини таъкидлади.

– Бугун биз учун қувончли кун. Бир кунда икки янги ишлаб чиқариш иншоотининг қурилиши ва ишга туширилишига гувоҳ бўляпмиз, – деди вилоят ҳокими. – Кумисбастау қишлоғида яхна ичимликлар ишлаб чиқарадиган йирик завод фаолияти бошланса, Жабағили қишлоғида паррандачилик йўналишидаги янги фабрика қурилиши бошланмоқда. Давлат раҳбари Қасим-Жўмарт Тўқаев таъкидлаганидек, қишлоқ хўжалигини ривожлантириш ва озиқ-овқат хавфсизлигини таъминлаш – бугунги куннинг устувор вазифасидир. Янги корхоналарда замонавий технологиялар жорий этилиб, минтақанинг ижтимоий-иқтисодий тараққиётини ҳамда озиқ-овқат хавфсизлигини мустаҳкамлайди. Янги фабрика келгусида ички бозор эҳтиёжини қондириш баробарида экспорт салоҳиятимизни ҳам оширади.

53,7 миллиард тенге қийматидаги сармоя асосида барпо этиладиган корхонада 1200дан зиёд иш ўрни яратилиши режалаштирилган. Фабрика 517 гектар майдонда жойлашиб, унда 96та парранда хўжалиги, инкубатор, ем-хашак заводи, сўйиш ва музлатиш цехлари, электр ва газ станцияси барпо этилади.

Лойиҳа уч босқичда амалга оширилиб, 2030 йилга қадар тўлиқ қувват билан ишга туширилади.