Давлат раҳбари “Достық – Мойынты” темир йўлининг  иккинчи линиясини ишга туширди

Kazinform. Қасим-Жўмарт Тўқаев “New Silk Way VII” Халқаро транспорт-логистика бизнес-анжуманининг очилиши билан табриклаб, тадбирнинг алоҳида аҳамиятини таъкидлади. Бу ҳақда Ақорда матбуот хизмати хабар берди.

– Бугун Қозоғистон транспорт-логистика тизимини ривожлантиришга алоҳида туртки берадиган “Достық – Мойынты” лойиҳасининг иккинчи босқичи ишга туширилмоқда. Тарихимизга назар ташлайдиган бўлсак, бундан ўттиз беш йил муқаддам “Достық – Алашанқай” лойиҳаси бошланган эди. Халқимизга Мактубимда транспорт-логистика соҳаси иқтисодиётнинг ҳаракатлантирувчи кучи, халқаро алоқаларни мустаҳкамловчи асосий омиллардан бири эканлигини алоҳида таъкидладим. Қозоғистон бу борада улкан имкониятларга эга. Буюк Ипак йўли Қозоғистон ва Ўрта Осиё орқали ўтган. Қозоқ замини азалдан Хитой ва Европа ўртасидаги олтин кўприк ҳисобланиб келган. Хитой бизнинг абадий, дўстона қўшнимиз ва ишончли иттифоқчимиз. Биз доим бир-биримизни қўллаб-қувватлаймиз. Икки халқ ўртасидаги муносабатлар мустаҳкам дўстлик ва ўзаро ишончга асосланган. Кўп соҳалардаги ҳамкорлигимиз мустаҳкамланиб бормоқда. Хусусан, “Бир белбоғ – бир йўл” дунёвий лойиҳасининг аҳамияти беқиёс. Биз ушбу лойиҳани ҳар томонлама қўллаб-қувватлаймиз ва уни амалга оширишда фаол иштирок этмоқдамиз. Чунки ушбу ташаббус мамлакатимиз манфаатларига тўла жавоб беради. “Достық – Мойынты” темир йўлининг иккинчи линияси бунинг ёрқин далилидир, – деди Президент.

Янги йўл юк ташиш ҳажмини беш баравар ошириш имконини беради. Шунингдек, бу экспорт товарларини етказиб бериш муддатини қисқартиради ва транзит салоҳиятини мустаҳкамлайди. Натижада мамлакатимиз Евроосиёдаги асосий транзит хабларидан бирига айланади.