Kazinform. Туркистон вилоят ҳокими Нуралхан Кўшеров раҳбарлигидаги расмий ва ишбилармонлар делегацияси Хитой Халқ Республикасига амалий ташриф билан борди.

Ташриф доирасида делегация Юньнань вилоятининг Куньмин шаҳрида бўлиб, Хитойнинг йирик давлат қурилиш корпорацияларидан бири – “Yunnan Construction & Investment Holding Group” (YCIH) раҳбарияти билан музокаралар ўтказди. Учрашувда Туркистон вилоятининг сармоявий салоҳияти, махсус иқтисодий ва индустриал минтақалардаги имкониятлар ҳамда давлат томонидан кўрсатилаётган қўллаб-қувватлаш чоралари тақдим этилди.

Нуралхан Кўшеров Қозоғистон Президенти Қасим-Жўмарт Тўқаев ва Хитой Раиси Си Цзиньпин ўртасидаги ўзаро ишонч ва яқин ҳамкорлик мамлакатлар ўртасидаги иқтисодий алоқаларни янада мустаҳкамлашга хизмат қилаётганини таъкидлади. Шунингдек, у хитойлик ҳамкорларни Туркистон вилоятида қўшма лойиҳаларни амалга оширишга таклиф қилди.

Музокаралар давомида автомобиль йўллари қурилиши ва логистика маркази ташкил этишга оид истиқболли лойиҳалар муҳокама қилинди. Хитой томони мазкур ташаббусларга қизиқиш билдириб, узоқ муддатли ҳамкорликка тайёр эканликларини маълум қилди.

Бугунги кунда Хитой Қозоғистон иқтисодиётига энг кўп сармоя киритаётган давлатлардан бири ҳисобланади. Туркистон вилоятида 218 мингдан ортиқ кичик ва ўрта бизнес субъектлари ҳамда 300дан зиёд хорижий капитал иштирокидаги корхоналар фаолият юритмоқда. Минтақа орқали халқаро “Ғарбий Хитой – Ғарбий Европа” транспорт даҳлизи ўтади.

Томонлар ҳамкорликни янада кенгайтириш ва сармоявий лойиҳаларини биргаликда ишлаб чиқишга келишиб олдилар.