Қозоғистон Республикаси Савдо ва интеграция вазирлиги томонидан бозорларда нарх шаклланишининг шаффофлигини таъминлаш ҳамда самарасиз воситачилар улушини қисқартириш юзасидан тадбирлар жадаллаштирилмоқда.

Шу мақсадда Савдо қўмитаси раиси Ернур Жаутекбаев Туркистон вилоятига хизмат сафари билан келиб, минтақадаги бозор раҳбарлари билан учрашув ўтказди.

Мулоқот давомида савдо занжирини тартибга солиш, воситачилар сонини камайтириш ҳамда савдо жараёнларини тўлиқ рақамлаштириш масалалари муҳокама қилинди. Эндиликда бозорлардаги барча шартномалар ва тўловлар мажбурий равишда ахборот тизимларида рўйхатдан ўтказилади.

Хизмат сафари доирасида Туркистон шаҳридаги «Қуаныш», «Алтын булақ», «Яссы» ва «Эко бозор» савдо масканларига ташриф буюрилиб, уларнинг фаолияти ҳамда нарх шаклланиш дастаклари ўрганилди. Шунингдек, вилоятдаги ишлаб чиқариш паркларига ташриф чоғида товар етказиб бериш занжирини ривожлантириш ва маҳаллий ишлаб чиқарувчиларни қўллаб-қувватлаш имкониятлари кўриб чиқилди.

Умуман олганда, республика бўйича назорат чоралари кучайтирилиб, қонун талабларига риоя этмаган субъектларга нисбатан қатъий чоралар кўрилмоқда. Йил бошидан буён 76та самарасиз воситачи савдо занжиридан чиқариб юборилган.

Мазкур тадбирлардан кўзланган асосий мақсад – хуфёна иқтисодиётни қисқартириш, ҳалол рақобатни ривожлантириш ҳамда аҳолини адолатли нархлар билан таъминлашдан иборат.