«Тоза Қозоғистон» умуммиллий ташаббуси доирасида «AMANAT» партияси томонидан «Тоза пайшанба» акцияси ҳам тизимли равишда ўтказилмоқда. Яқинда мазкур экологик акция Сайрам туманининг Орис қишлоғига қарашли Хўжақўрғон аҳоли манзилида Улуғ Ватан уруши фахрийлари хиёбонида ташкил этилди.

Унда туман маслаҳати депутати Камолиддин Тожиев, Орис қишлоқ округи ҳокими Иристой Ортиқов, «AMANAT» партияси Сайрам туман филиали вакиллари Нурбек Асилбек, Ғуломжон Ирискелдиев, шунингдек, Т. Рустамов номли мактаб раҳбарияти, «Көрікті Сайрам» муассасаси ходимлари, қишлоқ ҳокимлиги ва мактаб жамоаси иштирок этди. 

Тадбир давомида иштирокчилар Совет Иттифоқи Қаҳрамони Тоштемир Рустамовга бағишланган ёдгорлик лавҳаси атрофида ва Иккинчи жаҳон уруши фахрийлари хиёбонида тозалик ишларини олиб бордилар. Шунингдек, кўча қордан тозаланиб, йўлларга қум ва туз сепилди.

Тадбирда сўз олган Орис қишлоғи ҳокими Иристой Ортиқов Давлат раҳбари Қ. Тўқаев ташаббуси билан ўтаётган «Тоза Қозоғистон» лойиҳасининг аҳамиятига тўхталиб, озодалик ва интизомнинг жамият ҳаётидаги ўрнига алоҳида эътибор қаратди. Шу билан бирга, уруш фахрийларига кўрсатилаётган ҳурмат ёш авлод учун юксак тарбиявий аҳамиятга эга эканлигини таъкидлади.

 «Тоза пайшанба» тадбири атроф-муҳитни тозалаш, тарихга таъзим, ўтмишга ҳурмат бажо келтириш, бугунги авлодда умумий масъулият ҳиссини шакллантирадиган аҳамиятли тадбирдир.